ذكريات 2017

هللللووو إفففففففففففففرييييييييييي ووون ولكم تووو ماي بلوق

قلوووب من هنااا لبييتكم وحشششتوووونيي 

❤❤❤❤❤❤❤❤❤❤❤❤❤

وحشششتنيي الكتابة هنا بالمدونة بششكل مش طبييعي 😢💗  

لكن من طول الغيبات جاب الغنايم ما عليكم اعوضكم واعوض نفسي بإذن الله 😍✨

ما اقدر اوصف دي السنة حرفيييياً حللتها بالطول والعرض تكاد تكون اطول سنة حسيت بكل يوم فيها ما ضاع سدى ولا هباءاً منثورا

من جد سعيييدة احس صارت حاجااات كتييييييييييييييييييييير سعيدة يارب لك الحمد 

بستعرض معاكم أهم الأشياء يلي صارت لي في 2017 بالترتيب حسب التاريخ 🤓💕

يلاااا بسم الله

أبريل (4) 2017

أبها

رحت مع زوجي رحلة عمل لو لمدة 5 أيام

أبها مدينة جميلة وفيها طبيعة وخضار .. لكن ما حسيت فيها عناية وإهتمام سواء من أمانة المنطقة أو السكان

فيها بحيرات ومطلات زيها زي اي مدينة من مدن برا ما ينقصها شي غير شوية اهتمام وخدمات في الأماكن السياحية

زرت فيها هذه الأماكن

بحيرة طبب

     

منتزه أبو خيال

بحيرة سد أبها

مطل السحاب

السودة

 الجو كان بارد ويجنن وصلت درجة الحرارة هناك 11☃️

مايو 2017

التخرج من الثانوية

كانت من أحلى اللحظات في حياتي لما خلصت اخر اختبار لي في الثانوية 😢😍😍😍💕💕💞💞

رجعت البيت اصرخ وفي السيارة اصرخ ما بقي احد ما عرف اني تخرجت 💃💃

سجدت سجود شكر لله يلي ألهمني القوة والصبر عشان اوصل لدي اللحظة 

الثانوية كانت اصعب مرحلة دراسية لي في الحياة ..تاني ثانوي كنت حامل فيها وثالث كانت عندي هيفاء عمرها سنة وشهرين

حفلة تخرجي في المدرسة دفعت عليها اكثر حوالي 500 ريال

وللأسف كانت اخس حفلة في التاريخ مو عارفة فين ودو دا المبلغ الضخم يلي جمعوه من البنات

^ اتحسرت عليها اكتر مما اتحسرت على فلوسي يلي ضاعت في زينة الفصل في أولى إبتدائي 😢😂😂💔

كانت كل الفعاليات موجهة للعلمي ومسحوب سحبة اليمة على الأدبي قاعدين مزهريات

ع العموم الحاجة الوحيدة يلي فرحت فيها انو اهلي كانو موجودين

بعد كدا فطومتي الحب سوت حفلة تخرج ليا ولصديقتها الله لا يحرمني منها 💜💜💜

وصلتني هدايا كتيرة حابة اوثقها هنا عشان اضل دائماً افتكرها 💕💕

أمي الحبيبة : أسورة ذهب ، أخويا عثمان : طقم أكسسوار ، أختي فاطمة : مصحف عليه أسمي وعملت لي حفلة التخرج ، صاحباتي : أكسسوارات ، أخت زوجي ولاء : عطر ، صاحبتي دعاء : طقم أكسسوار ، عبد المجيد : كيكة ، عمتي ، طقم عطور وأهديت نفسي جهاز بي سي جديد 😍😍😍💃♥♥

    

حقيقي أوجه خالص الشكر لعبد المجيد حبيبي يلي دعمني لحتى آخر قطرة وشفت بعيونو فرحة تخرجي ♥♥♥♥♥

وحماتي يلي ساعدتني برعاية هيفاء ولكل وماما وكل
اهلي واحبابي وأصدقائي

ذكرى الثانوية حتضل محفورة بذاكرتي حصلتلي حاجات حلوة فيها كتير

 بالرغم من كل االحظات الصعبة يلي مريت فيها إلا أن اللحظات الصعبة هي يلي خلت للنجاح طعم مميز

يوليو (7) 2017

الشرقية

كانت رحلة عمل لزوجي لمدة يومين

قبل ثلاث ايام من سفري سبقني زوجي لهناك وأنا لحقتو وسافرت لوحدي لأول مرة في الحياة 😎👑

زرت الدمام والظهران والخبر

انصدمت مرة صغار وجمب بعض كأنهم أحياء في جدة

كان الجو حاااااااااااار مررة ورطووبة تكتم ساونا رباني حرفياً درجة الحرارة وصلت 46 😭😭💔

رحت معرض سايتك حبييتو وأتفرجت فلم بالقبة السينيمائية خطييييييييرر 😍👌

كانت الرحلة قصيرة اخدبي عبدالمجيد لفة وراني فين كان عايش لما كان بالشرقية واكلني من المطاعم يلي كان يحبها وبعدين رحنا البحرين

      

  

البحرين

قعدنا فيها 12 ساعة بس

رحنا القرية المائية جنة دلمون المفقودة

الملاهي مررة منعشة لعبت لييين دختت .. فللللةة .. بس عيبها انو 98% من يلي فيها شباب

رحت السينما اتفرجت فلمين وكانت اول مرة اروح سينما بحياتي ☹️❤❤❤

أغسطس (8) 2017

تركيا

يمكن اكبر حدث صار لي في دي السنة 

سافرت تبعد انقطاع عن السفر خارج المملكة لمدة دامت 9 سنين (عدا البحرين ما اعتبرو سفر لأنو كان بالسيارة ويوم واحد بس 😂)

جلست فيها 15 يوم

المدن يلي زرتها :  أوردو طرابزون أوزنغول آيدر بورصا أسطنبول

الثلاثاء والأربعاء (1/2)-8-2017

اردو .. عاصمة البندق

سميت بذلك لأنها تقوم بإنتاج ثلاثة ارباع البندق في العالم

تشتهر بمزارع البندق ومصانع الشوكولاتة بالبندق

ويعد بمثابة النفط لأوردو فتقدر قيمة صادرات البندق لها بقيمة ملياري دولار سنوياً ❤

مدينة ساحلية جممييييلة مطلة على البحر الأسود

ركبت التلفريك ورحنا لمطل بوزتابيه كان منظر المدينة مع البحر وشكل الأمواج من بعيد وأنت بتشرب الشاي ياخدك لعالم تاني

وأححلللى شي صار في اوردو إني سبحت في البحر

لااا أحكيييلكم الجووو كااان خيااال مغيم والهوا عليل وأنت قاعد في وسط البحر بتسبح وقدامك مدينة ووراها جبال خضرا

أتخيلو شعوري انتو بس وحتحسو بإحساسي

ما أنكر في البداية كنت خاايفة يمكن آخر مرة سبحت في البحر كان عمري 5 سنين < شابطة في عبد المجيد بغا كم مرة يغرق مني

لاكن شوية بعد التهدئة وجلسات النفس العميق ويحلفلي انو الأرض مو مرة بعيدة بدأت أحس بالجو وأستشعر الجمال يلي عايشة فيه

سبحنا 3 ساعات وساعة قعدنا نلعب في الرمل

في اليوم الأخير وإحنا طالعين من أودو رحنا مصنع شكولاتة بالبندق أسمو "ساقرا" (طبعاً هناك البندق افري وير ) لا أحكيلكم عن اللذاذة النوتيلا قدامك من المصنع تطلع حارة ( قلبي الصغير لا يحتمل 😭 ) بس يلي خقيت عليه أكتر عندهم شي زي النوتيلا أسمها زبدة البندق خخخخخخخخطططططططيرة خلصت برطمان كامل طول رحلة تركيا اشترتيت 14 برطمان هدايا لأهلي < ما حوصف الطعم بعد دا كلو 😂💔

سمعت انو في مصنع اولكر في نفس المدينة بس كان بعيد ما مداني اروحو 🙄

    

  

    

الخميس 3-8-2017

بحيرة سيرا غول

بحيرة جمييلة فيها بطات وكافيهات حولها

في مطعم كان فوق ع الجبل اسمه أكبينار يطل ع البحيرة أتغديت فيه وقعدت اتفرج ع البحيرة المنظر خراافة والأكل كان لذيذ كمان الحمد لله

  

مغارة تشال..

 اكبر مغارة بتركيا 😍👌

الطريق لها لحالو رحلة جميلة.. يمر بمزارع الفلاحين والمرتفعات كل 5 دقايق تشوف في الطريق منظر جديد ♥

من الداخل باردة جججداً ( لدرجة يخرج من فمك بخار😂 ) ندمت اني ما جبت معايا شي ثقيل

برا الجو ضباب وفي مطعم صغير يبيع شاي تركي وفطاير يعجنوها قدامك عجوزات لطيفات 🌸😍

مرة استمتعت فيها لو سافرت تركيا مرة تانية حزور المغارة تاني

      

 

    

أخدت لفة في طرابزون في ساحة اتاتورك وشوارعها وصار لي اخس مقلب في الحياة لما رحنا الفندق في الليل بعد يوم طويل وأكتشفنا  انو صارت لخبطة في الحجز وما عندنا اي حجز في الفندق

ووللأسف دورنا في جميع انواع الفنادق كلها محجوزة 

بلأخير رحنا لمدينة صغيرة جمب طرابزون اسمها أكشبات وأول ما وصلنا الفندق أغمى علينا كان لنا قريب 24 ساعة صاحيين 

الجمعة 4-8-2017

اوزنجول ♥

عبارة عن قرية تتوسطها بحيرة يصب فيها نهر يبدأ من بداية البحر الأسود ويستمر لبعد البحيرة بمسافة.. 

حولها جبال واشجار وفوقها ضباب والشلالات في كل مكان

حول البحيرة هناك العديد من الأسواق الشعبية وأطعمة البطاطس والوافلز والآيسكريم والمطاعم التي تشتهر بأسماك السلمون اللذيذة وبعض الأسماك النهرية الأخرى الموجودة بالبحيرة🐟🐠 وايضاً قرية الملاهي والأغاني التي تنتشر في الأنحاء التي تضيف الى القرية جو من المرح.. بالطبع لا أنسى الطريقة المفضلة للتنقل هناك "الدبابات" والحمدالله سقته ولم اصدم بأحد (يرجى من عبدالمجيد عدم قراءة الجملة الأخيرة)

صليت الجمعة في المسجد الأزرق يلي كان هناك

 صديقتي راحت في وقت ما كان فيه  ضباب قالتلي في الليل تشوفي النجوم كأنك قاعدة في الفضاء

بس كان ضباب وما شفت شي خسارة

أوزنغول تكاد تكون اجمل مديينة في الرحلة طبيعتها ساحرة أحب الأماكن يلي يجتمع فيها الطبيعة مع الفعاليات تحس انك عشت جو الطبيعة والحضارة ..

  

السبت، الأحد (5/6)-8-2017

آيدر

اسميها قرية الشلالات لأني شفت فيها اكتر من 20 شلال ونهر متفاوتين الأحجام والأطوال 

تعتبر ابرد منطقة وصلت درجة الحرارة ل17 درجة مئوية ( انا رحت في الصيف ) في الشتاء تكون كلها تلوج ☃️

المغامرات يلي عملتها: 

في الطريق من طرابزون الى آيدر قفزت عن طريق الحبل كان المنظر تحتي خياالي 👌😍

وكمان ركبت قارب تجديف في نهر خاااطيييير كانت احلى تجربة من بينهم الثلاثة 💜💜

وفي الطريق لقينا شلال وفي فوقو جسر يوديك لمطعم مطل ع الشلال 

اكلت من عندو سمك نهري وجبنة آخخخخخخخخخخخخخ يا قلبي 

عيوني دمعت وانا باكلها من اللذاذة يا نااااس ايش جبنة .. ما اعرف ايش اقول 😢😢👌👌♥♥♥

جبنة محلية في آيدر اسمها مهلما مدري ايش حاجة زي كدا ما لقيتها غير في الشمال التركي بس

ابشركم فطور وغدا وعشا اكل منها 😭😭😭💕💕💕💕

في آيدر

سبحت في النهر الجاري وجلست تحت الشلال 😍 ياا نااس ما احلى من سباحة البحر الا سباحة النهر معع انها خطييرة وممكن في اي لحظة يجرفك التيار وتطيح على صخور زي الشوك لكن شعوور غيير 

طلعت من هناك مجرحة جميع انواع الجروح بس انبسطت يكفي اني جلست تحت الشلال 

سكنا في فندق قدام النهر مباشرة أسمو إليزان داغ وانت نايم تسمع صوت النهر جمبك

في الليل كانت ليلة 15 وبان القمر فيها بشكل سااطع لأنو ما كان في انوار.. كانت احلى مرة اشوف فيها القمر بدا الشكل 🌕

  




  

في الصباح رحت لمكان في حمامات كبريتية الله لا يوريكم جبت العيييييد 

طبعاً يلي يعرف طريقة الحمامات الساخنة  هي عبارة عن مسبح في موية تزيد حرارتها عن 45 درجة مؤية

الطريقة حقتها انك تغسل جسمك بالمغاسل الخارجية بالبداية بموية باردة بعدين ترفع درجة الحرارة شوية شوية لين توصل لدرجة حرارة المسبح بعدين تغطس في المسبح وتجلس فيه تتنقع حق خمسة دقايق وبعدين تطلع في الهوا شوية او تغسل جسمك بموية باردة بعدين ترجع تغطس وتزيد الفترة شوية شوية وتعيد الكرة اكتر من مرة لين ما توصل ربع ساعة لا تكتر عن كدا

شايفين دي الخطوات كلها ؟ 

اختكم في الله مو دارية عن السالفة لبست ملابس السباحة وغطست في المسبح دايركت طبعاً اتصدمت من درجة الحرارة حسيت نفسي بتسلق بس انا احب المويه الحارة 

الناس جالسين منقوعين في المسبح وانا مسوية مارثون بسبح رايحة جية رايحة جية والناس تطالع مصدومة

بعد حول نص ساعة سباحة حسيت نبضات قلبي صارت مو طبيعة واني انكتمت والدنيا بتدور فيني (عبد المجيد في قسم الرجال وانا الحريم) والله ما ادري كيف حملت على نفسي وسحبت نفسي وطلعت من المسبح وانسدحت حسيت الدم بيغلي في عروقي وراسي 

ماني عارفة كيف اروح دي الدوخة والجوالات في الامانات ما يمدي اتصل ولا شي 

رحت خشيت في مروش موية بااردة قعدت فيه حول 10 دقايق لين حسيت جسمي عاد توازنو 

لبست وخرجت قعدت استنى عبدالمجيد

عبد المجيد طلع مبسوووط ويقلي والله خطييير حسيت جسمي محتاج زي كدا من زمان لما حكيتو حكايتي قعد يضحك قلي كان تعبتي نفسك وقرأتي لوحة الإرشادات 

رحت شربت كوكا كولا وحلفت ما عاد اطب حمام كبريتي بعد كدا 
  

الأثنين ، الثلاثاء (8-9)-8-2017

ودعت الشمال التركي وركبت الطيارة ورحنا ..

بورصا

رحت لكوفتجي يوسف يلي عندو الذ كفتة ممكن تدوقها بحياتك😭😭♥< يا ناس يلي راح تركيا وما داقها لا يسمي نفسو راح خراااااااااااااااااااااااافففة الذ اكلة في تركيا كلها هي والجبنة

رحت وصادقت الشجرة المعمرة 💕 

وخلتني افكر كتيييير بمين يلي زرعها وهل كان يتخيل بيوم انها ممكن تعيش ل 610 سنين؟  ونفسي انها تكون تتكلم وتحكيني ايش شافت وسمعت واتعلمت طول دي الفترة 💖

لنا حضنتها حسيت بطاقة حب كبيرة تشع منها خلتني احبها زيادة لأني عرفت انها تبادلتي نفس الحب والمشاعر 💞

دعيت ربي قبل لا اودعها انو يرزقني عمل صالح يدوم بعدي لقرون زي العمل الصالح يلي عملو يلي زرع دي الشجرة يارب ♥

.. بعدها رحت جبل الأولداغ اطول تلفريك ركبتو قعدت فيه حوالي ساعة ونص 😍♥ 

كان نفسي اطول في بورصا اكتر لكن الوقت ما اسعفني ☹️💔

 

(14-9) 2017-8

أسطنبول

بالعبارة السريعة رحت من بورصا لأسطنبول كانت رحلة جميلة 

حقيقة أسطنبول جوها ما عجبني كانت حارة مرة حسيت الشمس فوق دماغي 

بالرغم من انو الكل مدح لي اسطنبول الا انها اقل مكان استمتعت فيه ..يمكن عشان ما استأجرنا سيارة وكنا مقضينها ميتروهات ولا عشان مشيت كتير ولا ايش بالزبط ما اعرف

 لاحقاً تبين لي السبب اني رحتها في الصيف وانو الفندق كان بعيد عن محطة المترو حول ربع ساعة مشي

ع العموم رحت اماااكن جميييلة كتييييير واتوقع اسطنبول اجمل في باقي فصول السنة ما ابغا اخرب على نفسي صورتها لمجرد انو رحتها في الصيف وما عجبني الجو

في الليل  بعد ما وصلت وريحت رحت صليت العشاء في مسجد السلطان أحمد 

جميل وحلو التصميم حقو القباب الكتيرة واخدت جولة في الساحة 

الخميس 10-8-2017

 قصر توب كابي 

اجمل منطقة فيه كانت منطقة الحرملك باقي القصر حسيتو ماخد طريقة المتحف اكثر من انو حسسوني بجو القصر 

كان في اقسام عليها صيانة ما استمتعت فيه كتير صراحة وما اتوقع اني لو رحت حزورو مرة ثانية 

برأيي اسحبو على ابو جدو وروحوا دولما بهجة 

برج غالاطة

يوريكم منظر بانورامي لأسطنبول تبان فيه معالمها كلها .. رحتو ساعة الغروب فصار من كل جهة وكل دقيقة اشوف منظر

يجججنن مررررة انصح تروحو حتشوفو مناظر تاخد من العقل والقلب شقف 

   

شارع الإستقلال 

شارع انت بس تمشي فيه تتمشى خلاص 

اشترينا من هناك تذكارات وهدايا وشفنا العروض يلي بيقدموها الناس 

الجمعة 11 -8-2017

آيا صوفيا 

كنيسة حولها الفتاح الى مسجد ثم لاحقاً تحولت الى متحف

صراحة مملة والمعالم المسيحية يلي فيها اكتر من المعالم الإسلامية 

ممكن تعني الكثير للمسيحين لكن ما حسيتها شي واو للمسلمين مو باقي من الآثار الإسلامية الا الشي القليل مرة  

ما انصح فيها 

قصر دولما بهجة 

من أروع ما عمر الإنسان على وجه الأرض 

ياخي والله لساني تربط من كمية الفخامة الأناقة في كل شي .. وهذا كلو والقصر مبني من الخشب بس ومافي ولا مسمار 

حسيت بجمال وأصالة المسلمين .. كل شي كان مرتب وأنيق وأحلى شي بالقصر كلو انو مو محولينو متحف محافظين على رونق المكان زي ما هو عشان نعيش الجو  

ساحة القصر من برا والقصر بكبرو آية من آيات الجمال سبحان من علم الإنسان ما لم يعلم

مرررة حبييتو وانصح فيييه وبقووة ولو سافرت مرة تانية حروحو ان شاء الله

السبت 12 -8-2017

كانت رحلتنا في الليل الساعة 12

عملنا تشيك آوت من الفندق ورحنا بعفوشنا 

لـ اورتاكوي 

شاطيء جميل على البسفور تنطلق منه رحلات البسفور لمدة ساعة 

ركبتها وكانت ساعة الغروب المنظر كان يجنن والجو كان حلو يومها 

كنا في النص كان القسم الاوربي في جهة والآسيوي في جهة حلو الشعور  

جميييلة الرحلة مرة انبسطت فيها 

جلسنا بعد الرحلة بكوفي ع البسفور واكنا شي ما اعرف ايش هو عبارة عن بطاطس هارسين يلي جوتها وخالطين سجق وذرة وخضار وجبنة وتخابيص بس لذذذذيييييييييييييييذة 

شربنا قهوة تركي وجلسنا شوية اتجهنا للمطار

.

  

   

  

  

ما ححكي التفاصيل كاملة لكن وصلنا للمطار قبل الرحلة بساعة ونص 

صارت لخبطة في المطار وبسبب اهمال الموظفين وتأخيرنا ضاعت الرحلة 

ما حتكلم عن شعوري ساعتها جاني احباط واخس مافي الموضوع كلو انو اكتشفت انو الأتراك ما يطيقو العرب

ما انكر اتأخرنا كان لازم نكون قبلها ب3 ساعات موجودين لكن بسبب برود الموظفين وكل واحد يرمي ع الثاني ضاعت الرحلة 

ع العموم كان اقرب رحلة يمدينا نسافر عليها الأثنين العصر وقعدنا يوم زيادة في اسطنبول 

 الأحد 13 -8-2017

رحنا السوق في دا اليوم اتسوقنا

خرجنا من السوق أكلنا وكان في ملاهي 

طبعاً للمعلومة انا لديك اللحظة كنت مرة خوافة بس نفسي اجرب

وقلت لعبد المجيد ابا دي اللعبة بس خايفة وشجعني وركبتها 

ياخيي خووف وفللة وصراخخ كلو بنفس الوقت 😂😂💃

 الإثنين 14 -8-2017

صحينا من النوم رحنا المطار على طول صرنا مؤدبين :(

وهم بيفتشو العفش طلعو من شنطة عبدالمجيد قارورة زيت زيتون 

وقال ممنوع الزيوت تطلع الطائرة ورماه في حاوية الممنوعات

انا اتجنيت زيت اصلي حرام والله لسا ما فتحنا ومغلف بتغليف الطيارة ما عليه خطر ليش يرميه 

وقعدنا نترجى العامل وهو يقول لا في ديك اللحظة اتغير الشفت حق العمال وانا قلبي من جوا بيغلي 

قلت لعبد المجيد اسمع والله مو طالعة الطيارة والزيت مو معايا ..قلي مو راضي ايش نسويلو ؟ قلتله انت طالع فيه وانا بدخل يدي في الحاوية اطلعه قليي لااا لو مسكوكي يبهدلوكي .. قلت انت بس راقب الله يخليك 

قلي طيب يلا وانا قلبي قاعد يدقدقددقدقدق دخلت يدي في الحوية وقاعدة ادور الله يقلعها مليانة اغراض شوية كدا سحبت شي حسبتو قارورة الزيت طلع قارورة سفن كبيرة وعبد المجيد فرصع عينو انو بسرعة دخلت يدي مرة تانية وقعدت ادور ولقيتها 

وصرت اجججريييي واشتغلت في دماغي اغنية رررنن 

والله وفيدي قارورة السفن والزيت اول ما بعدنا  رميت قارورة السفن في الزبالة وحطينا قارورة الزيت في الشنطة 

وطلعنا الرحلة بسلام

طبعاً عبد المجيد صار يضرب فيني المثل في الشجاعة بعد دا الموقف 

كانت رحلتنا نوقف ترازنيت في الشارقة 11 ساعة 

اتفرجنا في الشارقة فلم Kidnap جمييل 

وكملنا ووصلنا جدة الساعة 9 الصباح 

قابلت هيفاء وحضنتها حضضنننننن كبييييييييييييييييييييييييييييييييير كانت اكتر شي استفقدتو برحلتي كلها

 رحلة لا تنسى انبسطت فيها كتييير ونصيحة اذا بتمشوا على مخططي حطو في بالكم انكم حتصحوا الصباح وما ترجعوا الا اخر الليل 

حرفياً حللنا كل يوم في السفرة يارب لك الحمد

-------------------------------------------------

21 - 8 -2017 

29/ 11 / 1438هـ

عيد ميلادي الـ 20

الشي يلي كان والمميز وما حيتكرر انو في 29-11 صار عمري 20 سنة 🙄👑

 ياه مين يصدق اني طلعت من سن الطعشات حسيت نفسي اني صرت كبيرة وعشرينية جادة 😂

عبدالمجيد فاجأني بكيكة في مطعم بابايا 

 دعيت ربي انو يجعلو بداية عقد انجاز ونجاح بحياتي ♥

سبتمبر(9) 2017

 الحج

في موسم حج عام 1438 كنت رايحة ازور أهلي في مكة 

وانا في الطريق قالي اخويا عمر شيماء انا رايح الحج تجي معايا ؟ 

كان باقي نوصل لبيت امي حوالي نص ساعة بس قلتلو وليش ما قلتلي كان جهزت نفسي ؟ قلي ما كنت حاطط ببالي خد احد 

سكت كان وضعي ابداً ما يساعد مو جايبة غيارات الا حق يوم بس وجاية بفستان وهيفاء ما ادري فين اوديها حتى عبايتي جاية بعباية المناسبات 

قعدت بلحظة صمت مررة نفسيي احج ولي فترة بطلب من الله ييسرلي حجة حلوة لكن مترددة لأن الموضوع جا فجأة وكان يوم عرفة يومتها 

بس أستحيت أقلو لا وانا بطلب من الله من أول ودحين لما الله حققلي مرادي أقلو لاء 

قلتلو طيب قدام

وصلت بيت ماما وحكيتها أخواتي قالولي اصحك تروحي والله بيمسكوا المفترشين ومررة حتمشي كتير لو مو فحملة وزحمة وووو ..الخ 

وماما شجعتني واتحمست معايا وقالتلي اجي معاك وحطيت هيفاء عند اختي

ولما بابا دري دعالي بالتوفيق وزوجي قلي الله يوفقك يارب

بالنسبالي كانت دي اكتر3 حاجات عرفت انو الله حيسهلي الحجة منهم 

ما انكر للامانة كنت امشي حول 6 ساعات متواصلة فعللاً انا مشيييت وتععبت لكن والله كنت احس اني مبسوطة وحاسة بخفة بجسمي وروحي حتى الشرطة والمنظمين كانو يساعدونا لما عرفو انننا مفترشين حتى القطار ركبنا فيه 

وماما ابداً ما تعبت تقول احس اني مو قاعدة امشي ولا اتعب .. كانت عمرة ميسرة بكل ما تعنيه الكلمة 

وبالنهاية هي كلها ايام معدودات بالله ما يستاهل الواحد يتعب فيها عشان تنمحى ذنوبو ويرجع كيوم ولدته امه ؟

خلصت الحج ورجعت جدة وانا مو مصدقة .. خرجت من بيتي بنية ابغا ازور امي ورجعت وانا حاجة .. في أكتر من كدا لطف من الله ؟

ربنا تقبل منا انك انت السميع العليم وتب علينا انك انت التواب الرحيم

----------------

إفتتاح موقع متجر الأرنب

الشي يلي كنت فخورة فيه جداً وكانت تجربة لا تنسى في حياتي..

أفتتحتتت موقعععييي اخيراً بعد معاناة وبهدلة في التصميم سنة كاااااملةة 

عمركم شفتر موقع يتصمم سنة كاملة ؟ ايوه دا موقعي

اكتر من سنة وانا اصمم فيه بعدين ايأس واسحب عليه وبعدين ارجع وهكذا 🙂💔

 في النهاية قعدت عليه صملت لين خلصتو..  تقريباً 80% منو انا يلي سويتو و20% كان من مصممين اخرين.. مرة كنت فخورة فيه ولقيت نفسي تلقائياً بعد ما خلصتو اخدت نفس عمييييييق وسجدت شكر لله عشنو اعطاني الصبر ما اسحب عليه زي كل مرة بس الحمد لله طلع على قد التعب 

الموقع :

bunniesstore.com

------------

كسرت حاجز الخوف بالمواجهة

انا عندي خوف من العاب الملاهي والتجربة يلي جربتها في تركيا لما ركبت ديك اللعبة حسيت انو دا الخوف يمديني اكسروا ان شاء الله

صاحباتي في داك اليوم كلموني نروح ملاهي الشلال في يوم الحريم 

ركبت قطار الموت ، الصاروخ والعاب تاننية بس يلي كنت خايفة منها دي بس 

حقيقي صح في البداية كنت مرة خايفة بس بعد ما واجهت خوفي وجربتها حسيت انو الموضوع ابسط من يلي كنت متخيلتو 

حطيت مع نفسي قرار بعد كدا اي شي اخاف منو اواجهو على طول ( عدا الحشرات انهيار عصبي )

وبس كانت تجربة حلوة حبيت اوثقها هنا كمان 😍 

-----------

أول يوم جامعي 

إنقبلت في جامعة الملك عبد العزيز في الدفعة الأولى ولله الحمد

وقدمت على الجامعة السعودية الإلكترونية وتم قبولي كمان

دخلت في حالة حيرة شديدة الكل قاعد يقلي كيف تتركي عبد العزيز وتروحي لغيرها والكل قاعد يتمنى يخشها 

كان نفسي ادخل جامعة الملك بس وضعي كان ابداً ما يسمح

 عندي هيفاء  وما ابغا اعاني نفس المعاناة يلي عانيتها في الثانوية حسيت اني قصرت بحق هيفاء وزوجي ونفسي ومتجري وما كنت حقدر اجمع بينهم لولا الله ثم دعم زوجي واهلي واهله 

الجامعة السعودية الإلكترونية نظامها مدمج جداً مناسب ليا اداوم يوم واحد في الأسبوع في السنة التحضيرية ويومين في التخصص

وباقي الأسبوع محاضرات افتراضية وكرف واجبات لين تطلع الواجبات من عينك يعني بالعربي كأنك داومتي لكن في بيتك وعلى جهازك ( بس يختلف من ترم لترم للأمانة حسب المادة )

ومميزاتها انو ينكتب في شهادتك ( انتظام )

( يلي حابب يعرف اكتر عن الموضوع يروح موقع الجامعة )

في النهاية بعد الإستخارة والإستشارة وقع اختياري على الجامعة السعودية

ولله الحمد راضية واحس الوضع عاجبني صح شهادة عبدالعزيز اقوى وسمعتها أحسن

لكن نظام الألكترونية أحلى ولقيت فيها التخصص يلي كان نفسي فيه ومو موجود بعبد العزيز 

أخترت تخصص تجارة إلكترونية 

بعد ما بدأت الدوام عانيت في أول ترم كنت كنت مضيعة بالإنجليزي لأنو الدراسة باللغة الإنجليزية 

لكن الحمد الله الترم الثاني احس اني اتعودت وصار الموضوع بسيط

حالياً مبسوطة مرة الحمدلله ومو ندمانة ابدا على اختياري لها 

أكتوبر(10) 2017

ابها

رحت مع زوجي رحلة عمل لو لمدة 3 أيام

نفس ملاحظلاتي في المرة الأولى 

زرت فيها هذه الأماكن

شارع الفن

الجبل الأخضر< المطل هناك يجنن 

بحيرة سد أبها

مطل ابها < مررة روووعة 

نوفمبر (11) 2017

حفل قمرة الختامي

ياخي دا الحفل حسيتو اثر بنفسي بشكل كبير 

اول مرة شفت مشاهير يمرو من قدامي ويتكلمو ويعيشو حياتهم زي ناس عاديين 🙂💔

ما اعرف ليش عندي صورة في دماغي انو المشاهير شخصيات خيالية .. لحد يسألني ليش 😂😂

دماغي ماهو مستوعب انو ذا انسان حقيقي احسو مو المفروض يطلع للعالم مكانو الجوال وخلاص 🤣😅😂😭💔

دي الحفلة الغت دي الفكرة من دماغي فحسيتها اثرت فيني

طبعاً ما اتصورت مع اي مشهور احس حركة هبلة ما اعرف ليش 

 انبسطت في الحفلة المشاركات كانت جميلة والفعاليات كمان 

-----------

نفذت فكرة كانت بتجول في خاطري من يوم ما وعيت على دي الدنيا

ايش فايدة الاشياء المدرجة تحت مسمى " الضيوف "؟

غرفة الضوف صحون الضيوف كاسات الضيوف كنب الضيوف .. الخ 

في بيت ماما كنت انقهر لما اشوفنا متحاشرين في الغرف

 وفي غرفة ما تستخدم الا كم مرة في السنة ومحد يخشها عشان لا تتوسخ 

في دواليب المطبخ اواني الضيوف ماخذة حيز كبير ومحد يستخدمها تحت مسمى الضيوف

كنت احس انو هذا موعدل اننا نعطل حياتنا عشان ضيوف يجو كم ساعة ويروحو 

تزوجت وزوجي اثث غرفة الضيوف ومكتبة في بيتنا يلي كان 4 غرف 

لما نقلت بيتي كان 3 غرف فزوجي باع المكتبة وخلى غرفة الضيوف 

بعد فترة حسيت انو غرفة الضيوف قاعدة للجن والعفاريت وانا محشورة في غرفتين وصالة 

جا سؤال في بالي ليش الضيوف لهم غرفة ؟ ليش ما يجلسو في الصالة يلي نجلس فيها ؟ 

سألت ماما قالتلي كيف تبي تجلسي الناس في الصالة حقتك غرفة الضيوف افخم وتبيض الوجه الصالة للاستخدام العادي

قلتلها والناس جاية عشان تشوف فخامة بيتي ولا تزورني ؟ قالتلي انتي ما تعرفي كلام الناس 

قلتلها بالناقص من كلام الناس هم كدا ولا كدا حيهرجو يلي ما يحبني حيطلع فيني عيوب لو كنت ارتب وافخم وحدة في الحياة

وبعدين اصلاُ انتي نفسك لما بتجيني واخواني بتقعدو في الصالة صح ؟ قالت ايوه ما بيننا نسوي ضيوف 

قلت ايوه يلي يحبني ما حيفكر بطريقة الضيفة والضيوف 

وخلاص قررت ابيع غرفة الضيوف حقتي وحولتها لمكتبة 

وزوجي ايدني وحولتها لأحلى مكتبة بعد ما كانت الكتب مرصرصة بالكراتين 

قسمتها 3 اقسام : مكتبة ، مكتب ، طاولة قراءة واجتماعات العائلة 

ولو تأيدوني سوو نفس فكرتي وبترتاحو كتير خصوصي العوائل الصغيرة والمتزوجين الجدد

ولمعلومية من يوم ما بعتها ما حسيت اني بحاجة لها 

ديسمبر (12) 2017

عمرة 

حبيت أختم عامي اللطيف بعمرة مع زوجي 

وأشكر الله على كل الأشياء الحلوة يلي أهداني أياها 

بالشكر تدوم النعم 

---

في آخر السنة طحت على رجلي وصار في شُعر بعظمة الكاحل وقعدت اسبوعين ما امشي

 حسيت بنعمة العافية الله لا يحوجنا لغيره صرت زي المعاقة 

وخلصصصصصصصصصصصصصص عااامي الجميل بحلووه ومره

ادري تفاصيل كتييييييييييييييييييييييييير

 لكن من اليوم ورايح حخلي مدونتي كدا قرقر واجد عشان لو رجعت لدي الذكريات بعد 10 سنين او 20 سنة افتكر كل الحاجات الحلوة وما انسى شي 😍♥

لسا في تدوينة حأكتبها ان شاء الله قريباً عن لوحة الأهداف يلي كتبتها في 2016 ايش حققت منها في 2017 👍

وحتكلم عن الكتب يلي قريتها وحكتب تدوينة هيفاء يلي انسحب عليها 😂

كونوا في القرب أحبتي .. أستمتع بقراءة تعليقاتكم وإن تأخرت بالرد 

أحبكم