2 ضد 1 !

السلام عليكم ورحمة الله 

ما أدري كم قعدت متنحة في الكيبورد وأنا أتذكر إيش أهم الأحداث يلي صارت في الشهور الماضية 

منها المضحكة والمبكية والجميلة والمدهشة و ... إلخ 

لكن لما قعدت أفكر إيش أكثر شي كان شاغلني فيها تذكرت موقفين 

المضحكة المبكية والميتة من الفرحة والمؤمنة والمنشكحة والمفاجئة والمدهشة كلو في وقت واحد !

ونظراً لأنها صارت في وقت واحد وتكابلت علي سميت التدوينةضد< الأسم كشخة صح

ونظراً لأني فتاة تحب أن تكتب مذكراتها في هذه المدونة فأني بعد هذا الغياب الطويل لا تتوقعوا مني أكتب سطرين وأمشي !

إستعدوا للألف سطر القادمة ! < فيني قرقر واجد بالعربي  

---

بداية القصة 

في يوم مشرق وجميل بعد ما خلص وجا الليل كذا في المغرب تقريباً

^ لا تسألوني إيش شاربة تعبيري صار محشش فجأة 

المهم جا زوجي وقالي إنه جاب الكاميرا يلي صورونا فيها بفرحنا 

طبعاً أنا هنا طلعت من عيني قلوب بشوف كيف شكلي كان في الفرح 

وطرنا ع الصالة انا وزوجي وشبكنا الكاميرا في البلازما وقعدنا نشوف اشكالنا 

 انا كنت متخرفنة مع نفسي ومبسوطة انه طلع شكلي جميل الحمد لله وقاعدة ارمي بوسات لنفسي بالبلازما وحالتي حالة

ما ادري انا هنا طقيت نفسي عين ولا ايش!

بعد ما خلصت الصور رحت جريت واخذت الهاردسك حقي يلي فيه 

( افلااامي ، الصور حقتي ، تصاميمي بالفوتوشب ، بحوثي ، كتاباتي )

كان جهازي فاضي وكنت معتمدة إعتماد كامل على ذا الهادرسك يلي فيه كل شي يخصني ..

الزبدة اني وديته لزوجي وقلت له حط فيه الصور عشان اوريها لأهلي بعدين 

انشغل زوجي بعدها وحطيته انا على الطاولة عشان يفتكره وينقلها لما يفضى 

بعد كذا مرت عدة اسابيع وكنت اشوف هاردسك في محله انسحب عليه مسكين

تقريباً بعد شهرين اجي أدور للهاردسك في الصالة ؟

أختفى  !

سألت عبد المجيد اذا هو أخذه قال لا !

قلبت البيت رأساً على عقب دورت بأماكن مستحيل اصلاً يكون فيها

فصفصت البيت فصفصة وبالنهاية ؟ ما لقيته 

قعدت ابكي حسيت كل ذكرياتي اتمسحت كنت محطمة نفسياً بطريقة فظيعة 

استمريت بالبحث لأكثر من 3 شهور 

كنت ابي اصمم بالفوتوشب ما عندي الأدوات .. كنت بتفرج افلام ما عندي كل شي كان مختفي 

كان عبدالمجيد يواسيني ساعتها ودور معايا بكل مكان 

وقالي مرة انا كان عندي هاردسك قبل سنتين سويت فيه نفس حركتك من ناحية الأفلام والصور وكذا 

وكان فيه أمور مهمة تفيده بشغله وبرضو ضاع < كان زوجي ساعتها ساكن في ينبع ونقل من ينبع والبيت وكل شي يعني نسبة انه يلاقي الهاردسك 0% !

طبعاً خففت علي مواساة زوجي حسيت انو في احد زيي بدي الحياة 

وفي يوم آخر مشرق وجميل كنت في السيارة مع زوجي وقلت تخيل لو الهاردسك في السيارة !

قعدت ادور في السيارة وانا اضحك على نفسي مثل الغريق يلي يتعلق بقشة !

لكن الصدمة  !!!!!!

إني لقيت هاردسك زوجي يلي ضاع قبل سنتين تحت مقعد السيارة !!!!

مستوعبيين ؟؟؟

طبعاً زوجي مات من الفرحة وما كان مصدق كان فاقد الأمل من إنو يلاقيه 

شكرني زوجي وقعد يدعي لي اني الاقي هاردسكي كمان 

   حسيت انو ربي خلاني الاقيه عشان ما افقد الأمل قعدت ادعي ربي كثيييييير 

في أثناء تلك المعمعة سألتني أمي وين صور فرحك ما وريتينا هي ؟!

حكيتها على هاردسكي وقلت لها بقول لعبد المجيد يعطيني الصور اوريك 

< طبعاً حابة اقلكم انو بعد ما شفنا صور الفرح من الكاميرا نقلها عبدالمجيد عندو ورجع الكاميرا لأصحابها 

كلمت عبدالمجيد وقعد يدور فين نقل الصور 

وأكتشفت بعد فترة انو الصور ضاعت كمان 

ما حأوصف حالي ساعتها الهاردسك يهون يتعوض 

 بس صور الفرح من وين الاقي لها بديل!

كانت ازمة بالنسبالي .. لدرجة اني فكرت اعيد الفرح ثاني مرة واعزم الناس < 

قرأت بعد فترة رسالة جاتني عن الإستغفار وفوائده العظيمة 

أتأثرت فيه كثير وصرت كل ما اشوف نفسي فاضية استغفر ..

بعدها بما يقل عن اسبوع .. يومين فقط  !

رحت عند ماما لتفاجأني ! لقيتو يا شيماء 

شلالات من الدمووووووووووع وآلاف علامات التعجب والإستفهام 

إيش جابو عند ماما ؟؟ لا من جد ايش جابو لمكة وانا في جدة؟

والله ما صدقت لين شفتو قدام عيني وانا متأكدة إني ما وديتو عند أمي أبداً !!

سجدت سجود شكر والله شعور ما ينوصف ما تتصدقون كمية السعادة يلي كنت حاسة فيها 

آمنت بلإستغفار صرت على كل شي أستغفر أول ما احس أموري معطلة أستغفر 

والله ما تصدقوا قد إيش الإستغفار عظيييييييييييييييم والله نصيحة لكل واحد عندو شي يهمه 

" إستغفروا " 

استمريت ع الإستغفار وكنت متنمنية إن ربي مثل ما حقق لي الأولى بمعجزة يخليني أحقق الثانية 

أمي الله يحفظها كانت دايماً تقلي حافظي على أذكارك يا شيماء وكنت دايماً ما اقولها 

لأسباب مرات كسل ومرات نسيان ومرات اكون مشغولة ..

بعد شهر يمكن وضعت لنفسي هدف إني أقرأ أذكاري كل يوم 

حتى لو إيش كان يشغلني وفعلاً ربي ما خيبني !

عبد المجيد لقا صور الفرح بمكان ما اتوقع يكون موجود فيه 

كانت فرحتي اعظم والله اني صرت انقز ع السرير من الفرحة 

ما تصدقون قد إيش طعم سجود الشكر لذيذ لما ربي يفرج لك هم كان على راسك مثل الجبل !

الحمممممممممممممممممممممدلله .

وريت الصور لأهلي وأحتفظت فيها وأنا دحين مبسوطة وسعيدة بكل شي الحمد لله 

طلعت من ذي الحادثتين بشغلتين ..

( الإستغفار و الأذكار ) 

ولو قالولي تعيدي الزمن فيك وتتخيري ان يضيعوا الصور والهاردسك منك وتكسبي الإستغفار و الأذكار ولا يبقوا الصور والهاردسك وتخسري الإستغفار و الأذكار ؟

كان أخترت يلي أختاروا ربي .. الأولى طبعاً !

( وعسى أن تكرهوا شيئاً وهو خيراً لكم ) 

كل يوم يزداد إيماني بذي الآية !

الحمدلله الحمدلله الحمدلله .

صارت أحداث ثانية بعدها بس يدي تعبت وانا أكتب :"| 

أنا أتراجع عن الألف سطر ذولي يكفوا 

كانت تجربة حلوة وإن بدت في البداية إنها مؤلمة !

الحمدلله دائماً وأبداً 

ودمتم حامدين وذاكرين ومستغفرين