عنق الزجاجة !

* ملحوظة قبل القراءة : قد تجد بعض التفاصيل المملة لا تستحق أن تذكر .. تذكر بأن كل حرفاً أكتبه في تدويناتي يعني لي الكثير ..

***

استيقظت بعد ساعتين تقريباً .. فتحت عيناي بصعوبة تمنيت ان انام ٢٠ سنة .. لكن كل ما تذكرت ان هناك مفاجآت بإنتظاري دفعني ذلك للنهوض

كانت الغرفة شبه مظلمة كانت امي تجلس على كرسي بجانبي وتضع على اذنها الجوال تزف خبر ولادتي لإخوتي

اغلقت السماعة عندما انتبهت لإستيقاظي وقامت وقبلت لي رأسي واحتضنتني .. " الحمدلله ع السلامة حبيبتي مبارك ما جبتي "

ابتسمت من قلبي ساعتها وسألتها وين عبد المجيد ؟ قالت مع البيبي .. قلت وين البيبي ؟ قالت مع عبد المجيد قالتلي والله ما ادري بس اتوقع بيخلص اجراءات الحضانة

بعد دقائق وصلت اخت زوجي ولاء وباركت لي وقالتلي ان عبد المجيد ودا البيبي الحضانة وهو حالياً فوق في الغرفة دحين بيطلعوك .. جات الممرضة ودتني الحمام وغيرت ملابس الولادة بعد تععبب شديييد ومع مساعدة الممرضات كنت احس كأنو فيل جا دعسني عضامي كلها مكسرة ومافيا حيل اسوي شي

بعد ما غيرت الملابس حطتني الممرضة بكرسي متحرك وقالتلي يلا اطلعك

قلت لها لحظة بلبس عبايتي وناديت ماما تجيبها .. قالت ماما جات حماتك قبل لا تجي وشالت كل اغراضك ودتها الغرفة ومنها عبايتك .. انا كذا قلت طيب ايش اسوي .. جات الممرضة قالت مافي مسكلة مدام هادا مرة قريب بس انا في يتلع اسنسير وبعدين يمشي سوية لاقي غرفة < لا يا شيخة انت ووجهك المالح

جات ماما لقت في بالدولاب حق المستشفى شرشف رمتو عليا غطتني صار شكلي زي الشبح مو شايفة شي

وصلت الغرفة وسمعت صوت عبد المجيد وامي تقلي لا تفكي لا تفكي وانا مستغربة اشبهم مخليني كدا متغطية

.. وفجأة يفكو الغطا عني والاقي غرفتي كلها بلاليين مزينينها تجنن < انا كنت مزينة غرفتي في بيت ماما بس ما كنت مخططة اني ازين غرفتي في المستشفى لأني بقعد يوم واحد بس

مرة انبسطت لقيت اخوات زوجي وحماتي وابو زوجي و زوجي كلهم موجودين بيباركولي مرة انبسطت ️️️️️

****

ما حكيت لكم قصة تسمية البيبي من الشهر الرابع انا وعبدالمجيد نفكر وكتبنا قائمة ب ١٠٠ احلى اسم نحبهم وكل شوية نشطب فيهم اخترنا تقريباً منهم ٣ اسماء .. ( ملك .. تسنيم .. رزاز )

< طبعاً كان الكل يحشنا انو ما اخترنا اسم لين الولادة

بعد ما جلسنا وارتحت وشكرتهم ع المفاجأة كتب عبد المجيد ال ٣ اسماء على ٣ اوراق وقال انو الاسم حيكون بالقرعة

طلع القرعة ٧ رزاز ١ ملك

وقع الاختيار على رزاز وقررت اسميه لكن في اخر لحظة دورت على معناه ولقيت معناه خايس فبطلت منو ورجعت لحيرتي ️

طلبت البيبي يجيبوها عندي ومسكتها لأول مرة في حياتي كانت صغيرة ومنفخة ولطيفة مرة

^ كانت أول مرة في حياتي أمسك بيبي كان عندي فوبيا من الاطفال الرضع 

****

راحو اهل زوجي وجوني زوار من اهلي واهل عبدالمجيد

وطلبت هيفاء يجيبوها عندي واستفرغت شي اسود فجأة فنص الليل وطلع بعدين انهم اعطوها حليب قارورة ونص مع انه الطفل يشرب تقريباً نص رضاعة في اليوم كلو

صار فلم هندي بعدها الدكاترة قالو لازم نعطيها مغذي ونسوي لها غسيل معدة ومدري ايش وعبد المجيد عارض ما اذكر التفاصيل لكن كان المستشفى سيء جداً من ناحية استغلال العميل يطلعو البلاوي فيك عشان بس يستغلوك

طالعولي البيبي بعد مضاربة من عبد المجيد عشان ارضعها طبيعي

طلعت لي معاها دكتورة وقالتلي رضعيها يلا البيبي كانت مو عارفة ترضع ولا انا خبرة بترضيعها كانت الدكتورة فوق راسي قاعدة بتقلي شفتي ما بينزلها شي يلا كلمي زوجك يقلنا ننزلها .. عصبت وقعدت اخاصم نرفزني اسلوبها ماخدة الموضوع تحدي وقاعدة بتحطم بدل ما تشجع ..!!

حسيت في النهاية المستشفى كرهنا لأنهم مو قادرين يستغلونا بشي بالنهاية وقعنا ورقة انو لو صار شي للطفلة حيكون على مسؤوليتنا بعد ما طفشنا من تهاويلهم لدرجة قالولنا انها لو ما سوت غسيل معدة البنت حتموت !! وطلعت من المستشفى وما فينا الا العافية !

***

خلص اليوم يلي بعدو وركبت السيارة يلي اتفغصت بالهدايا والورود خصوصاً !

وصلت بيت ماما بعد اطول سفر قضيته في حياتي تعبببت

وصلت بيت ماما وطلعت ونمت .. في اليوم الثاني كانت اختي وصلت وقام عبد المجيد بيرجع جدة ..

قلت لو ليش ياخي اقعد ️ قلي والله لازم اروح بس اسمعي بقلك كلام .. قلت ايش ؟

قلي عمرك شفتي كيف الصاروخ يطير للفضاء 🤔 قلت ايوه ؟ قال كيف يطير في البداية ؟ قلت بشويش لين يوصل فوق بعدين تزيد السرعة شوية شوية

قلي دا بالزبط يلي بيصير معاك يا شيماء .. في البداية حتلاقي كل شي صعب بعدين شوية شوية حتصيري خبرة وتعلمي الناس كمان🏻 كلامو شجعنييي كتييير

بعد ما جاني احباط لأن البيبي مو عارفة ترضع مني ودعته وشكرته وقعدت مع اخواتي ..

اتصل عليا عبد المجيد في الليل وقلي ما قررتي ايش تسمي البيبي ؟ قلت لا بس اذا لسا محتارين بسميها تسنيم .. قلي اسمعي ايش رأيك اسميها هيفاء على اسم ماما ؟ اتفاجأت وقلت لو خليني افكر واردلك

كنت قاعدة محتارة وشافتني بنت اختي قالتلي ايش سميتو البيبي ؟ قلت ما اعرف ايش رأيك ؟ .. سكتت شوية بعدين قالت ايش اسم مامت عبد المجيد ؟ قلت هيفاء .. قالت خلاص سميها هيفاء اتصدمت صراحة انا يلي كان يردني هو معنى الإسم وش ذات القوام الممشوق وش اسوي بقوامها انا ؟ رحت استشرت ماما واختي وكلهم قالولي الاسم حلو سميه وشجعوني رحت لعبد المجيد وقلت له تم وانا لسا مو قتنعة فيه ️

طبعاً عبد المجيد كلم امه وقالت ما حأرضى لين شيماء ترضى ولما عرفت اني راضية يا قلبي عليها ما صدقت وقالت خلاص الكسوة حقتها عليا وكل سنة لها اسورتين ذهب

وسمينها " هيفاء "

صار احلى اسم في حياتي بعد ما كان مو عاجبني الاسم لحالو لو رنة في قلبي

***

نمت ذيك الليلة مثل الميتة بعد محاولات يائسة بترضيع هيفاء وانا مو قادرة لكن نذرت على نفسي اني ما ارضعها بكره الا طبيعي 🏼

صحيت اليوم يلي بعدو على صوت هيفاء وما كنت نايمة الا ساعتين بس

قعدت احاول فيها احاول فيها بالنهاية يئست وقلت ذي اخر رضاعة ترضعتها صناعي ونشوف

صحيت الظهر واخدتها وقلت بسم الله وبدأت تعافر لكن رضعت !! رضعت يا ناس وربي صرت اصرخ مو مصدقة وبنفس الوقت كان مررررة يألم لأنها اول مرة ️️

< شعور مرة حلو ما رضعتها بعدها صناعي لين صار عمرها ١١ شهر ما شاء الله

بعد ٥ ايام بدأ لون هيفاء يتغير صار لونها اصفر مثل الليمون كانت مصفرة قبل ٣ ايام لكن صار الان صفارها يلفت حتى عيونها صفرا !!

اكتشفت انو دا مرض الصفاري يجي للمواليد الجدد وعلاجها الشمس ولب الخرنوب

كنت كل يوم اشمسها في الصبح والعصر والحمدلله اتعافت بعد مرور ٢٠ يوم من ولادتها

****

في تلك الفترة كان عبد المجيد عند مامتو كلمت عبد المجيد سمعت صوتو متغير قالي انه تعبان شوية ومسخن وكنت كل ما اكلمو يقلي نفس الكلام وانا اعرف سخونة عبد المجيد ما تمزح

اليوم يلي بعدو ادخل سناب الاقي اختو مصورتو وهو في المستشفى ونايم وفيدو المغذي :|

خييير انا اخر من يعلم ؟ اتصلت عليه ما يرد

كلمني بعدها قلي انو هو راح اعطوه مضاد لسخونة ومغذي عشان السخونة طولت وان الموضوع مافي خوف

كنت اطمن عليه لكن كان واضح ان الموضوع ما نفع معاه والظاهر انه انتكس .. استغربت بالعادة عبد المجيد بس ياخد المغذي يتعافى

بعد يومين تقريباً كنت قاعدة اشمس هيفاء دخلت سناب دقيت اخته مصورته انه منوم في المستشفى خير يا اوادم انا جالسة بعيد ومو دارية ايش الهرجة ️

رحت عند ماما قعدت ابكي اقلها زوجي مريض ابا ارجع جدة امي قعدت تخاصمني تقلي يعني ايش حتسويلو وانت نفاس ويالله تشيلي نفسك وبنتك ؟ وقعدت تهديني وقالتلي اذا صحي كلميه

اتصلت عليه بعد فترة لقيت صوته تعباااان قلت يا عبدالمجيد صارحني لا تقعد تكذب عليا تقلي مسخن وانت فيك شي !!!

قلي اسمعي .. قلت هلا ؟ قال انا جاني الصفاري 🙂 قلت وش صفاري تستهبل ذا حق المواليد بس 🤔 قلي والله 🙄 قلت كييف وقعد يحكيلي القصة :

قلي انا جاتني سخونة ورحت المستشفى مثل مو عارفة واخدت مغذي ووصفولي مضاد .. رجعت البيت اخذت المضاد ولا الاقيني انتكست وفجأة قلبت عيوني صفرا وجسمي اصفر ولساني حتى البول حقي الله يكرمك صار لونو احمر !! استغربت وقعدت اقرأ بالروشيتا حقت الدوا دقيت من الاعراض الجانبية انو يسبب مرض اليرقان ( الصفاري ) رحت المستشفى طلع عندي التهاب الكبد الوبائي B وعصارة الكبد الصفراء بدل ماهي ٥٠-٩٠ صارت ٢٩٠٠ !!! والمرض مالو علاج وبينوموني بالمستشفى لين ربي يفرجها

كانت صدمتي كبيرة .. كنت ساعتها ما بنام في اليوم الا ٣ ساعات تقريباً من هيفاء وكنت تعبانة جداً لأني بطلع السطوح كل يوم واقعد اشمسها .. كنت عانيت اسبوعين عصيبة جداً من اتعب ايام حياتي ما عرفت ايش ارد غير اني دعيتلو ..وقفلت السماعة وانفرجت بكا

***

مرت ايام صعبة كنت كل يوم ابكي فيها .. كان عندي حاجة اسمها اكتئاب ما بعد الولادة يخليك تدور اتفه الاسباب تبكي عشانها كنت كل يوم ابكي عند ماما اترجاها نرجع جدة مرات كانت تهديني ومرات كانت تخاصمني ومرات كانت تتجاهلني وتغير الموضوع وكانت دايماً تقلي انتي نفاس وطلعة جدة حتتعبك ..

اخويا عثمان كان كل يوم بيشوف السيناريو دا بيتعاد لين طفش وقال لماما والله شكلي حأخطف شيماء واوديها عند زوجها والله مرة تحزن ️

بعد جهد جهيد كان مر ٣ اسابيع على الولادة وافقت ماما ننزل جدة بشرط انو بعد ما نزور زوجي بالمستشفى ترجع بيتي واكمل نفاسي هناك ووافقت ..

رحت اخيراً جدة كنت مو مصدقة وعبدالمجيد طاير من الفرحة

وصلت المستشفى بعد ما اشتريت باقة ورد مشيت مع ماما واخويا للغرفة كان قلبي بيدق بسرعة وصلت الغرفة وشفت عبد المجيد كان في اخوات عبد المجيد جوا قام عبد المجيد يسلم على اخويا عند الباب كنت ساعتها حأبكي من الفرحة ️ بغض النظر عن حالة عبد المجيد المأساوية وشكله كان مثل الموزة نحييييييف كأنه نزل ١٠ كيلو واصصصفر حضنت عبد المجيد وانا قاعدة امسك دموعي بالعافية انها ما تطيح وينخرب البرستيج واخويا مبسوط ماخذ وضعية انو هو مجمع الحبايب وقعد اخويا يقول يعني مو معقول بس شيماء غابت اسبوع انت مرضت ياخي اثقل شوي ️

راح اخويا وامي وقعدت مع عبدالمجيد واهلو قالولي انو عبد المجيد طالع بكره من المستشفى لأنو المرض مالو علاج بس لازم يخفف من الدهون وبس ياكل مساليق ( خضار ولحوم مسلوقة )

رجعت بعد ٣ ساعات تقريباً بيتي استقبلتي ماما كانت سبقتني لهناك دخلت غرفتي حسيتها مهجورة حطيت راسي على سريري الدافي ومخدتي ونمممت نووم عمييييييق من احلى النومات بحياتي < كنت في بيت ماما اعاني من ارق ما يجيني نوم حتى لو كنت بموت من النعاس

****

صحيت فتحت ستاير غرفتي وقعدت اتذكر كلام وحدة قالتلي انو مهما كنت متعلقة في بيت اهلك لما حتعيشي ببيتك حتحسي انك ملكة فيه مهما كان البيت سيء او مبهدل ملكة سواء كان كوخ او قصر ولما ترجع بيت اهلك صح مرتع الطفولة وبيت ناس يحبوك لكن في شعور مختلف جداً عن بيتك انت ..

يمكن اسمو الاستقلالية ؟

طرحت السؤال على نفسي وانا اطالع في السماء .. قطع تفكيري ماما وهي بدق الباب ودخلت علي بفطور كبدة ومجلب وعصيدة < اكثر اكلات كرهتها في النفاس ️

قعدت اكلها وتشكرتها قلت لها النفاس الجاي ما بجي مكة خلاص تعاليلي انت بيتي ️ قالت ان شاء الله .. المهم اسمعي انا بنزل مكة بعد ٣ ايام حيبدأ دوامي تبي تجي معي ولا انزل مكة لوحدي ؟ جا السؤال مثل الصاعقة !! ليش يا امي مو اتفقنا تقعدي معي ؟ .. ايوه بس نسيت موضوع الدوامات ! .. غيبي اول اسبوع حرام لسا ما كملت شهر حتى هيفاء ما اعرف احفضها ولا اروشها .. مو مشكلة اعلمك بذي اليومين .. الله يخليك اقعدي .. يا شيماء انا ما عندي مشكلة اقعد معاكي ستين شهر بس تعالي في بيتي ما اقدر اترك دوامي وانا المديرة وخصوصاً اول اسبوع يجو الطالبات يسجلو ..

سكت حسيت فجأة اني وحيدة وعدت نفسي اني ابدأ اتقبل اني اعيش مع طفل لحالي اعتني فيه ١٠٠٪‏

**

في اليوم الثاني جا عبد المجيد زارني في البيت بالرغم من منع امه انو ما يسوق السيارة لحالو وما يجيني عشان ما اتعدى لكن جاني وزارني وراح اليوم يلي بعدو

جا اليوم يلي ماما ترجع فيه بيتها كنت حزينة جداً بشكل وفجأة صارت بطني توجعني وجع مو طبيعي ..

كنت بصرخ وافرفر وجع اقوى من وجع الولادة مضاعف الف مرة حسيت فجأة انو روحي حتطلع امي انفجعت عليا بعد ما كانت اتجهزت عشان تلبس عبايتها وترجع البيت كنت بتلوى ع الفراش لوهلة اتمنيت اموت ولا يستمر الوجع

سوت لي امي قربة وسدحتني وبدأ يخف الوجع شوية شوية استمر لمدة نصف ساعة حسيت خلالها انهد كل حيلي وصبري قعدت أبكي من قلبي كنت حاسة أنو نفسي لوهلة اطلع الفضاء اعيش في كوكب تاني ولا اموت ولا يصير فيني اي حاجة .. أستغفرت ربي على أفكاري المأساوية !

جاني عبد المجيد لما عرف انو ماما رايحة ودعت ماما وقلي عبد المجيد انو حنرجع لحياتنا زي أول ما حيقعد عند امو 

 نتأقلم مع هيفاء ومرض عبدالمجيد والنفاس حقي ونشد نفسنا بنفسنا وما نعتمد على احد غير الله .. ونعم بالله

***

في فترة نفاسي ومرض عبد المجيد صارت مشاكل بالشركة يلي يعمل فيها زوجي .. اضاربو الشركاء واتفككت الشركة وفقد عبد المجيد وظيفتو .. كان عندي اكتئاب رهيب حاسة بفراغ مو طبيعي بعد ما بدأت الدراسة وانا قاعدة حياتي حصرت بين رضاعة وتحفيض وتهدئة هيفاء والطبخ وتنظيف البيت .. كان عبد المجيد بيساعدني لكن كنت ما ابغى اجهدو عشان ما ينفع يتعب ..

كان صعب الاقي وقت لنفسي تقريباً هيفاء كانت ماخدة ٨٠ ٪‏ من الوقت ١٠ ٪‏ للبيت ٥٪‏ لعبد المجيد ٥٪‏ لنفسي

كلمت قعدت اوصفلوا معاناتي يلي كان بيعاني هو كمان منها يكفي انو كان بيسهر في الليل معايا لما تصحى هيفاء ويروشها لأني انا كنت اعرف اروشها عبد المجيد اكتر شخص وقف معايا وما حسسني اني لوحدي وكان دايماً يوريني انو هو مو تعبان مع انو كذاب انا عارفة انو تعبان ..

عبد المجيد هداني بعد ما شكيتلو وقعدت ابكي وقلي يا شيماء تقدري تقولي انو نحنا الان في مرحلة عنق الزجاجة يلي بعدها بإذن الله حنلاقي الوسع والغنى والصحة بإذن الله

مسكت في ديك الايام الصلاة ع النبي كنت اصلي في اليوم ١٠٠٠ صلاة .. مهما كانت ظروفي زعلانة او كئيبة او مشغولة كنت اصليها استمريت لمدة شهر تقريبا

وبدأت الدنيا بالإتساع .. خرجنا من عنق الزجاجة !