ذكريات 2018

السلام عليكم ورحمة الله وبركاته ..

كيف حالكم جميعاً ؟ 💗

وأنا بكتب ذكرياتي ل 2019 كنت مقررة أني ما أكتب ذكريات 2018 .. كانت سنة صعبة بالنسبالي وللسبب ما ما كنت حابة أوثقها كنت حابة أتجاوزها بحلوها ومرها ..

وبعد ما كتبت ذكرياتي ل 2019 حسيت أنو غلط اني بيوم أرجع لمدونتي وألاقي في سنة مفقودة من ذكرياتي ما كتبت فيها شي وأقعد أتساءل إيش صار فيها .. كما أنو الأيام الصعبة في 2018 كانت سبب في نجاح سنة 2019 لأني أتعلمت منها كتير ..

فمن باب الشكر والأمتنان لها أني أوثقها ..

على العموم قررت في الأخير إني أكتب الذكريات السعيدة فيها وأتجاوز عن الذكريات الأليمة ..

يلا ببدأ .. بسم الله 

..

27 مارس 

من بداية السنة ما حصلت أشياء تستحق إنها تدون .. كان أول حدث في يوم 27 مارس

في عيد ميلادي الـ 20 ( بالسنة الميلادية ) قررت أسوي فكرة مجنونة شوية 

كانت وحدة من أحلامي .. بس مرة كنت مترددة أسويها وعشان أحمس نفسي حطيت في بالي موعد لتنفيذ الفكرة وهو عيد ميلادي الـ 20 

الساعة 12 تحديداً ضفرت شعري ومسكت المقص وقصيت ضفيرة طولها حوالي 30 سم من شعري ..

ياااااه على الشعور الجميل ..

 وقفت أتأمل في شعري القصير .. 

وأنا بقص شعري أتمنيت إنو أبدأ عقد جديد من عمري خفيف ومليء بلإنجازات 

وأتخيلت إنو كل مخاوفي وهمومي أنقصت مع دا الشعر ..

حطيت الضفيرة في كيس وقررت أتبرع فيها لجمعية خيرية تسوي باروكات لمرضى السرطان ..

بعد ما قضيته حسيت شخصيتي أتغيرت كتييير .. بلا مبالغة ..

حسيت إني صرت مرحة ودمي خفيف وانا طبعي هادية وفيني رزانة حبتين << بس طاروا مع الشعر 

رحت اليوم يلي بعدو عند الكوافيرة عدلت لي شعري ..

الكوافيرة لما شافت شعري أنصدمت ( هي تعرفني دائماً أجي عندها ) 

قامت تخاصمني إنو ليش قصيتي شعرك كان حلو .. ولما وريتها القصة يلي أباها بغت تنجلط إني أبا أقصو زيادة ..

قامت قصته بلا نفس وأنا أقلها يا شيري قصي زيادة .. وهي تقص كأنو من قلبها يا عمري عليها 

المهم يارب لك الحمد القصة طلعت عليا تجنن أحلى من الشعر الطويل بكتير .. وأتحمسو أهلي 2 من أخواتي قصو شعورهم 

أحتفلت بعيد ميلادي بشعري القصير وحققت وحدة من أمنياتي بالحياة 

 صورة القصة يلي سويتها  

كيكة عيد الميلاد يلي عملتها

2 أبريل

أشتركت بنادي رياضي لـ 7 شهور .. وللأمانة كانت فكرة سيئة وقتها
كان التوقيت للإشتراك قبل نهاية الإجازة الصيفية و بداية الجامعة بشهر تقريباً ..
وقتي مرة مزدحم بالمذاكرة بالإضافة إلى مشاغلي ومسؤولياتي تانية يلي كانت تمنعني من الإلتزام بالذهاب يومياً..
كنت بروح يومين أو ثلاثة بالأسبوع .. والغريب في الموضوع إنو وزني زاد خلال إشتراكي بالنادي حوالي 4 كيلو 😂😂😭😭
ليومكم دا ماني عارفة إيش السبب الناس ينقص وزنها في النادي وأنا يزيد 😂😂
والجدير بالذكر إنو بعد ما خلص إشتراكي بدأ وزني بالنزول ونزلت حوالي 8 كيلو خلال سنة تقريباً
لكن على العموم تجربتي كانت جميلة .. حسيت لياقتي زادت مرة كتير .. ودخلت بتحديات مع نفسي وكانت الرياضة بتعطيني طاقة وحماس ..
لكن لو سألتوني هل حتعيدي يا شيماء التجربة في وقت تاني لو سنحت لك الفرصة ؟
للأمانة ممكن أعيدها لكن مو بنفس مدة إشتراكي بالمرة الماضية
كفاية مرة شهرين تلاتة لين جسمي يبدأ يتعود على الرياضة ويتحمس بعدين أكمل في بيتي
 أشوف فكرة شراء معدات رياضة وعمل التمارين في البيت فكرة أفضل بكثير بالنسبالي
عن نفسي أتحمس وتتشجع هيفاء تسوي رياضة معايا وتنبنى عادة صحية عندها
وفعلاً أنا بدأت بعد ما خلص إشتراكي بعمل رياضة بالمنزل لكن كان ينقصني تحديد وقت معين خلال اليوم أستمر عليه أسوي رياضة فيه
ولو أنحلت دي المشكلة برأيي أفضل بألف مرة من النادي
على أي حال تجربة النادي كانت تجربة جديدة وأشوف إنها ضافت لمسة حلوة على سنة 2018

11 يوليو

في سنة 2018 رحت على ينبع 3 مرات .. مرة في 11 يوليو ومرة في 30 ديسمبر
وكلها الأثنين كانت رحلات عمل مع زوجي
ومرة رحتها مع أهلي
أحب ينبع .. يعجبني بحرها وهدوئها وأنها منظمة
رحت زرت أخويا يلي عايش هناك
والبحر .. وبحيرة ينبع الصناعية وأَكلت السمك خبز هناك 😍

 

   

21 يوليو

رحت الدمام للمرة التانية في رحلة عمل مع زوجي ( المرة الأولى كانت في 2017 ) 
ودي المرة أخدت معايا هيفاء كانت كبرت وصار عمرها ثلاثة سنين
قلت آخدها نروح البحرين ألعبها في الألعاب المائية ونتفرج فلم زي السنة الماضية .. بس حصل شي ما كان بالحسبان أبداً 😭😭
واحنا في نص الجسر رايحين للبحرين وقفنا لعسكري الجوازات ..
وبكل سعادة وحب وبإبتسامات عريضة تعلوا وجوهنا احنا الثلاثة أعطيناه بطاقات الأحوال تبعنا ..
وخدها الشرطي وطابق حقتي وحقت عبد المجيد .. وسأل .. وين جواز البنت ؟
وسادت لحظة صمممممممممممممممت ..
عبد المجيد طلع له بطاقة العائلة ووراه أسم هيفاء قال هادي هي
 العسكري : لازم جواز للبنت ما تدخل بدون جواز ..
- طيب دا بلد خليجي ..
- أيوه بلد خليجي أنتو تدخلو بالبطاقة بس البنت ما عندها بطاقة تدخل بالجواز
شيماء : يا شيخ الله يعافيك دي بنتنا يعني حتكون بنت مين شوف الشبه وأسمها مكتوب ببطاقة العائلة كمان
العسكري بإبتسامة : يا أختي والله انا مساءل وما يمدي أدخل بنت من بلد لبلد بدون ما يتسجل في السيستم
- إيش نسوي طيب 😢
- خلاص أرجعو السعودية
- أوك يعطيك العافية

كنتم مع أكبر مقلب أكلتو في حياتي 😂😂😂😂
يالله رجعت الفندق مننكككددةة ما أبا أكلم أحد .. السفرة بكبرها عشان هيفاء والبحرين وما رحناها 😓
سبحان الله مدري إيس يلي شال فكرة الجواز من بالنا مررة .. أول ما رجعت من السفر رحنا طلعنا لهيفاء جواز على طول
وعاد لحسن الحظ إنو الفندق كان فيه مسبح قعدت أسبحها فيه طول السفرة
ووديتها قبة سايتك أتفرجنا فلم عن الشعاب المرجانية
وربكم سامع الدعا .. أتفرجت هيفاء فلم وسبحت .. نفس هدف السفرة بس مو بالبحرين 😂😂
عاد وأنا راجعة من الجسر قلت لعبد المجيد ما ينرفز في الموضوع الا انو دفعنا رسوم الجسر وما رحنا 😂😂😂
وغلاق الناقص في الرجعة وقفنا الشرطي عشان يفتش السيارة
وفجأة طلب مننا ننزل وأتجمعت الشرطة .. عاد أنا هنا أنخرشت السيارة مستأجرينها وجا ببالي لايكون يلي قبلنا حاطط فيها شي
فكفكوا جلدة الباب والسنادة يلي على الباب مدري في إيش كانوا شاكين فيها
المهم بعد شوية قلنا الشرطي السيارة سليمة أركبوا
عاد مو كفاية ما رحت البحرين كمان أنخرشت في الرجعة 😂😂
كان موقف لا ينسى وكل ما أتذكر الموضوع أضحك من القلب
والحمد لله يلي خلى الذكرى الحزينة ذكرى سعيدة بعد فترة وأتعلمنا من الموقف دا

 

 

1 أكتوبر

رحت المدينة مرتين في 2018
مرة في 19 يناير ومرة في 1 أكتوبر
في يناير زرتها في الويك إند وصليت الجمعة ..
وصدف انو أهلي كانو هناك كمان قابلتهم .. وأخويا أشترى عباية لهيفاء وقعدت صلت معايا 😢💗💗 .. الأجواء كانت باردة وجميلة الحمد لله
يلي في أكتوبر رحت زرت متحف سكة الحجاز في المدينة المنورة
كانت تجربة مرررة حلوة حبيت المكان .. من أحلى الأماكن السياحية يلي زرتها في السعودية
السكة كانت تربط بين المدن التي بين المدينة وإسطنبول في العصر العثماني وحالياً تحولت الى متحف
المتحف يشرح تاريخ المدينة المنورة من عصر ما قبل التاريخ إلى عصرنا الحاضر وما تميزت به في كل عصر..
وموثق بالصور والآثار ..
أستمتعت مرة فيه وأنصح تروحوه لو زرتو المدينة

 

 

24  نوفمبر 

 أستأجرنا مع أهلي فيلا صغيرة بدرة العروس ( وبالرغم من اني عادة ما أًوثق في الذكريات طلعاتي مع أهلي إلا إنو دا اليوم كان من أروع أيام حياتي .. أنبسطت فيه من القلب فاستحق التوثيق )

في دا اليوم صارت أشياء حلوة كتير ..

هيفاء سبحت في البحر لأول مرة في حياتها ..

سوينا حفلة لأختي بمناسبة عيد ميلادها ..

يمكن كان أكتر شي مميز في دي الطلعة إننا فصلنا ضحك مع السهر .. حرفياً ضحكت من القلب .. 

بلإضافة إلى انو الجو كان مررة لطيف والقمر كان بدر .. إيش أبا أكتر من كدا ؟ الحمد لله يارب

  

29 نوفمبر

جربت أروح البر أول مرة في حياتي
يمكن تستغربوا إنو وصلت العمر دا وعايشة في السعودية وما عمري رحت البر ..
للأمانة ما كانت الفكرة تجي على بالي .. خصوصي إنو عند أهلي ما كان البر من ضمن قائمة التماشي أبداً
وبعد ما أتزوجت طلعات أهل زوجي كانت غالبها على البحر
المهم داك اليوم جا الطاري وقلت لعبد المجيد انو ما عمري رحت وأنصدم 😂
وقلي لازم تروحي تجربي .. وفعلأ أشترينا حطب ورحنا بمكان خلا وسوينا أحلى شاهي على الحطب 😍😍
ندمت على عمري يلي ضاع وأنا ما عمري رحت فيه طلعات زي كدا 😢💗💗

18 ديسمبر

في آخر سنة 2018 جاني إكتئاب من البيت
حقيقي كنت كل ماني قاعدة فيه أحس بهم وغم ولما أطلع من البيت كم يوم وأرجع له أحس بضيقة ما نفسي أدخله
كنت أقول لعبد المجيد إني أبا أنقل وضعي ماهو طبيعي
كانت وحدة من الأسباب الرئيسية عشان ابا أنقل هو لون بوية البيت وأثاثه
حرفياً كانت الصالة والمكتب والمطبخ وغرفة الطعام وبوية البيت كلها ألوانها ( بني ، ذهبي ، أبيض ، بيج )
وأنا أصلاً دي الألوان خلقة ما أطيقها ومهما أحاول أخرج عنها ألاقي نفسي محصورة بسبب لون البوية لأنو مو كل شي يناسب البني والبيج ( لون البوية من يوم ما سكت البيت كان المالك هو مدهنها مو أنا أخترتها )
المهم في يوم من أيام حسيت إني موو طااايقة نفسي قلت لعبد المجيد الصالة أبا أغيرها مو عاجبتني
قلي يمكن ننقل بعد 9 شهور .. قلتلو لو حننقل بكرة ما حأقدر أصبر أكتر 😭😭
رحت صورت الكنب والصالة وعرضتها في حراج وأتباعت بسرعة وبسعر كويس الحمد لله
رحنا اليوم يلي بعده سوق الكنب وقعدت حرفياً حوالي 6 ساعات أختار القماش يلي يعجبني والتصميم يلي أباه ..
مع الأسف إني إنسانة أبحث عن الكمال دائماً في كل شي ودا يخلي ذوقي في إختيار الأشياء مرررة صعب مو أي شي يعجبني ..
المهم أخترت التصميم والقماش يلي أباه وقلنا حيسلمنا هو خلال أسبوع ..كان الأسبوع دا هو بداية  فترة الإختبارات النهائية للترم الأول ..
أختكم في الله ما صبرت لين تخلص الإختباراتها .. رحت قلت لزوجي لازم ندهن البويه قبل لا يجي الكنب
أوك وين المشكلة ؟ إني أبا أدهنها أنا بنفسي 😂😂
أصريت على عبد المجيد إنو أنا أبا أجرب أدهن بنفسي قلي انو صعب خصوصي انو بفترة الإختبارات
بس إلا أبا أدهن أنا < لا حول ولا قوة إلا بالله
المهم عبد المجيد لما شافني كدا مصرة قلي والله براحتك حأدخل أنام وإنتي تدهني عشان لا تقولي يا عبدالمجيد ساعدني 😂😂
قلت طيب .. والله ورحنا محل البوية أخترنا اللون يلي يناسب قماش الكنب يلي اخترناه وجيت طبعاً ما قصرت قبلها بيومين أدور مقاطع كيف تدهن بيتك بنفسك 😂😂
وجيت وقت الجد أبا أبدأ بنفسي حزن عليا عبد المجيد وقلي حساعدك خلاص
بلا مبالغة قعدنا حوالي 6 ساعات عمل متواصلة ندهن في الغرفة
وعاد ليتني أنا يلي دهنت .. تقريباً 80% من الشغل سواه عبد المجيد والباقي أنا < ولا على قد الزن أبا أسوي بنفسي 😭
صراحة كانت تجربة مررة حلوة ومرة ممتعة ومرة متعبة بنفس الوقت
تعتبر وحدة من التجارب يلي سويتها ومرة أنبسطت فيها بس ما حكررها
أنصحكم تجربوها لأنو العمر مرة لازم تجربوا كل شي في الحياة 💓

المهم بعدها جا الكنب وطلع لونو مرررة حلو الحمدلله مع البوية ..
 ورحت محل السجاد أشتريت سجادة < نفس معاناة الكنب قعدت سنة أختار
بعدها بفترة أشتريت نجفة بيضا سادة عادية ورحت محلات الورد الصناعي وزينت النجفة بنفسي
وعلقت لوحات وأشتريت أباجورة
الحمد لله بعدها ما أحد يدخل الصالة إلا يقلي إنها تجيب الراحة النفسية
وأكثر من شخص سألني عن التفاصيل وحكيته القصة .. و2 من صاحباتي أتشجعوا ودهنوا غرفهم بنفسهم
والأهم من دا كلو إني حبيت البيت بعدها .. وزاد إرتباطي بالصالة .. صرت أحسها تمثلني لأنو كل شي فيها أخترتو عن حب وقناعة
حتى بعد 9 شهور قلت لعبد المجيد إني ما أبا أنقل خلاص 😍
أتوقع إنها حتضل وحدة من أجمل تجارب حياتي .. يارب لك الحمد

صورة صالتي ( قبل )

  

 خليت هيفاء تدهن معانا بما إنها كانت مشخمطة على الجدران من أول < بطلت تشخمط بعدها 😂

 

الصالة ( بعد ) 

النجفة

22 ديسمبر

كان يوافق يوم 14/4/1440
في دا اليوم كملت أنا وعبد المجيد 5 سنين على عقد قراننا
قعدت أفكر كيف إن السنين مرت بسرعة كأنو كان أمس ..
حمدت الله على كل شي .. حقيقي الحمد لله أحلى سنين عمري عشتها معاه 💓
أحتفلنا بكيكة قطعناها إحنا الإثنين ومعانا هيفاء
كان يوم سعيد وأقدر أقول إنو ختمت فيه سنة 2018 💓

 --

أحداث أخرى حدثت في 2018 تستحق الذكر :

1- عبد المجيد أشترى سيارة جديدة

2- بدأت أتعلم السواقة

3- وصلتني هديتين مرة لطيفة من أعز الناس على قلبي :

- من أختي 

أفتتحت متجرها الإلكتروني وساعدتها فيه بحكم خبرتي بمتجري ..
واهدتني سلسلة وإسوارة دهب مرة حبيتهم 💗💗💗💗

- الهدية التانية كانت من أعز صاحباتي
 بالرغم من بساطتها إلا إني حبيتها ودخلت قلبي مرة 😢💓💓

 

الله يسعدهم يارب 

4- في الشتا نزل مطر في مكة وطريق مكة وجدة صار كأنو نهر
كان منظر رائع وطريق مكة صار كلو أخضر سبحان الله (شتا 2018 كان من أطول الشتاءات يلي مرت على السعودية ودا أتوقع يلي خلا الأرض تخضر )

5- جربت أكون نباتية لمدة اسبوعين
في سنة 2018 إرتفع عندي الوعي الغذائي والصحي وجربت أنظمة غذائية كتيرة ..من ضمنها كان النظام النباتي أو الخضري (Vegan)
وقفت بعدها بفترة .. مو لشي معين لكن حسيت يلي بسويه مو صح ..
ع العموم مسألة الغذاء لسا ما حسمت أمري فيها تماماً لكن أقد أقول إنو أترسمت لي ملامح لكيف الواحد يتغذى بشكل سليم ..
يمكن أخصص تدوينة خاصة أكتب فيها خلاصة خبرتي في الصحة والغذاء الى الآن

من ضمن الأشياء يلي جربتها كان صيام العصير الأخضر 

---

سنة 2018 أكتر سنة أتعلمت منها حاجات مرة كتيرة .. حقيقي كانت سنة تعليمية بالنسبالي وفادتني كثير في 2019 ومتأكدة حتفيدني في سنواتي الجاية كمان .. أعتبرها وحدة من أكثر السنوات يلي طورت من شخصية شيماء

سعيدة جداً إني كتبت ذكريات 2018 في دي المدونة ما أتجاهلتها ..

وبالله التوفيق