السلام عليكم ورحمة الله وبركاته
كيف حالكم جميعاً ؟ ..
سنة 2019 تعتبر من أكثر السنين الحافلة في حياتي ..
في دي السنة حصلت حاجات كثير رهيبة وخضت تجارب جديدة .. بحاول أسرد أهم الأشياء يلي صارت فيها ..
التدوينة دي تعتبر أطول تدوينة كتبتها في المدونة كلللها ..
حرفياً أقدر أقول إني قعدت فيها شهور أكتبها ؟ كل شوية أكتب منها جزء وأوقف .. وبعد ما كتبت نصها قررت أكتب تدوينة 2018 فوقفت فترة طويلة بعدين رجعت لها .. أستهلكت مني جزء طويل من وقتي.. للأمانة لما كنت في 2019 ما كنت حاسة إنها كانت سنة حافلة لدي الدرجة ما شاء الله 😂💗
فكرت كثيير إني أقسم التدوينة على أجزاء
بحيث أخلي سفراتي في جزء .. والأحداث الباقية في السنة في جزء آخر ..
لكن حسيت إنو صعب عليا أقسم المدونة لأجزاء وهي كل جزء يكمل بعضه ..
وفكرت إني أختصر الأحداث بحيث إني ما أسهب كثير بشرح الحدث
بالنهاية قررت إنو أكتب التدوينة بالطريقة يلي لو رجعت لها بعد 10 سنين أقول شكراً يا نفسي لأنك كتابة كل دي الذكريات الحلوة وتذكريني فيها 💗💗
بسم الله نبدأ ..
21 يناير
دي السنة كانت مليانة رحلات عمل لعبد المجيد .. معظمها ما رحتها .. بس وحدة من الرحلات يلي رحت فيها كانت الى تبوك .. قررت أروح أستكشفها خصوصي إني ما رحت لها قبل .. وبما إنها تعتبر قريبة من الأردن ( تبعد عنها 4 ساعات تقريباً بالسيارة ) أتشجعت مرة قلت عصفورين بحجر أزور تبوك والأردن سوا ..
سويت جدول للرحلة كالعادة ..
وجا يوم السفر وأنطلقنا ..
الجو في تبوك كان مرة برد ..
الأماكن السياحية في تبوك كانت مررة قليلة خلصناها كلها في يوم 😭
رحنا على :
1. سكة الحجاز
بس مع الأسف كانت مقفلة ما مدانا ندخلها
2. مسجد التوبة
3. متحف قلعة تبوك
يعتبر أحلى معلم في المدينة 💗.. يسرد تاريخ مدينة تبوك من عصر ما قبل التاريخ على عصرنا الحالي ..
التفاصيل التانية مكتوبة في الصور 👇
كان في جنب القلعة 3 عيون مياه تقريباً ( بس جافة )
الأولى عين سكر
والأثنين الباقية كانت برك عين تبوك
وكنا بنروح بحيرة تبوك بس مع الأسف الطريق غير معبد لها وسيارتنا كانت غير مؤهلة للخوض في الرمال
رحنا غرزنا وسحبونا أهل الخير ورجعنا أدراجنا للفندق زي الطيبين 😂😂💔
وكان نفسي أروح جبل اللوز كان وقتها فيه ثلج 😍
بس برضو كان الطريق لو طويل ووقتنا ما كان يسمح
وبس والله .. جلسنا 3 أيام في تبوك
وبالرغم من إنو ما كان في فعاليات كتير بس والله انبسطنا والأجواء كانت مرة حلوة
24 يناير
في يوم الخميس .. خلص زوجي شغله وإنطلقنا من تبوك إلى الأردن بالسيارة
عاد أبشركم كنا طلعنا جواز لهيفاء ما صار فينا مقلب زي الدمام 😂😂
والجدير بالذكر إنو كانت دي المرة الأولى يلي تسافر فيها هيفاء برا السعودية
خطة الرحلة كانت اننا نروح البتراء وبعدين عمان ومن عمان نرجع لتبوك
وصلنا البتراء في الليل .. أتعشينا وصحينا الصباح اليوم يلي بعده .. ومن هنا بدأت المغامرة ..
البتراء .. هي وحدة من عجائب الدنيا السبعة الجديدة
وتسمى المدينة الوردية .. بناها العرب الأنباط في قبل سنة 400 قبل الميلاد
صار معانا موقف هناك بذكرو عشان يلي يروحها ما يصير معاه زي يلي صار معانا ..
أول ما قصينا التذاكر ودخلنا على منطقة البتراء أستقبلونا مرشدين معاهم احصنة بيقعنونا نركب فيها لأن الطريق طويييل ويباله مشي الين نقدر نشوف كل معالم البتراء ..
أتشجعنا وقلنا نجرب تجربة ركوب الحصان مع زيارة المعالم
بعد ما ركبنا قالوا لنا ان في طريق عن طريق الجبال نطلع ليين فوق نشوف فيه كل معالم البتراء فيصير بدل ما نقعد 6 ساعات لين نلف البتراء ناخد 4 ساعات + بعد ما نطلع الجبل ننزل للأرض ونشوف فيها أهم المعالم ..
لا أخفي عليكم أنو جاني شعور انو في نصبة بالموضوع .. لكن الرجالين كان بيقرقروا مرة كثير ما أعطونا فرصة للتفكير
وكان ما خدنا الحماس بزيادة ولما سألهم زوجي عن سعر الجولة قالوا ما نختلف
(وأنا نسييييت هنا حكم مرة مهم بالإسلام إنو ما يجوز تشتري أو تبيع شي ما تعرف سعره)
المهم وافقنا وطلعنا بالجبل وأخذنا جولة شفنا فيها المعالم من بعيد ..
كانت رحلة مرة جميلة وبعد ما شفنا المعالم من بعيد وأكتشفت لأول مرة انه الحصان يمديه يتسلق الجبل << لا تسألوني كيف
أتصورنا مع الخزنة من بعيد ونزلنا أخدنا لفة على أهم المعالم عن قرب وأتصورنا .. كانت الرحلة رائعة بالرغم من انها خدت 6 ساعات تقريباً ( مو زي ما قال 4 ساعات) تعبت مرة وانا راجعة وشفت الزوار يلي سلكو الطريق الطبيعي للرحلة وحسيت بحسرة اني ما شفت كل المعالم عن قرب .. صح المشي مرة متعب لكن كان يكفيني إنه أركب حصان من غير رحلة الجبل يلي طولت الطريق ع الفاضي ..
في نهاية الرحلة .. رجعنا مكان ما طلعنا وجا وقت الحساب .. وأتفاجأت أن المرشدين طلبوا مبلغ خيالي ما يستحق أبداً ..
وبعد طول نقاش وزن واصرار من طرفهم كان لازم نرجع الفندق لأنو مرة أتاخرنا ولا حيحسبوا ليلة زيادة ..
تم أتفاق على مبلغ وأعطيناهم هو .. وكان مبلغ أكثر من المفروض يندفع ب 500 ريال !!
يعني لكم أن تتخيلو أعطيناهم حقهم + حوالي 500 ريال إضافية 💔💔
زعلت مرة والموقف مرة قهرني .. وحسيت انه كان غبااااااااء مننا كيف أخدنا الحماس وسلمناهم نفسنا بالرغم من اننا ندقق في أبسط التفاصيل بالعادة ..
وأكتشفت خلال الرحلة أنو نصهم شايفين السعوديين بنوك متحركة وحلال فيهم النصب (خصوصي انو سيارتنا سعودية فكان مرة صعب نخفي دا الشي)
وصااار معانا خلال 3 أيام الرحلة في الأردن أكثر من 4 مواقف نصب ( ما بين يجيبولنا منيو بدون أسعار أو يفاجؤونا أن الخروج من الفندق الساعة 12 وعشان صارت الساعة 12 ونص يلا ادفع ليلة زيادة وما بين توقف في موقف سيارة عادي ويجي أحد يقلك دا الموقف بفلوس يلا ادفع) نفدنا منها كلها الحمد لله ما عدا تبع البتراء
بشارك معاكم بعض الصور من الرحلة 💗
بالرغم من كل شي .. المدينة كانت جمييلة والرحلة لها لا تفوت (لو أتفاديتو غلطنا) ووحدة من أمتع التجارب يلي خضتها في حياتي
حقيقي أنصحكم تروحوها بشدة مرة أنبسطت فيها
بشارك معاكم بعض الصور من الرحلة 💗
مدخل البتراء
صور من القبور والبيوت الملكية المحفورة في الجبال
تأملوا طبيعة الجبال وألوانها 😍😍
الخزنة (أشهر معلم بالبتراء)
المدرج الروماني (الآثار الرومانية موجودة لأن الرومان قاموا بغزو البتراء وضمها لإمبراطوريتهم)
وادي موسى ( "وسُميت المنطقة بهذا الاسم لأنَّ نبي الله موسى عليه السلام نزل في مكان هذا الوادي، وكان على علم باقتراب أجله، فأخذ الحجر الذي يتفجر منه 12 عيناً، وسمّر نبي الله الحجر في أحد جبال تلك المنطقة، وبعد ذلك خرجت منه 12 عيناً، ثمَّ تحولّت إلى 12 قرية، وكانت كلّ قرية لسبط من الأسباط، وبعد ذلك مات نبي الله موسى عليه السلام، وبعد وفاته بقي الحجر مكانه") بس ما شفنا الحجر
السيق (مكان بين الجبال فيه سد ونظام سقاية كان يسقي البلدة )
بعد ما خلصنا من البتراء .. رجعنا الفندق أخدنا أغراضنا وأنطلقنا الى عمان
أخد مننا الطريق حوالي 3 ساعات ونص
وصلنا الفندق المغرب تقريباً ولا أحكيلكم قد إيييش كنت بموت من التعب
الفندق كان رائع وتعاملهم جججداً راقي ومحترم .. كنت أخدت فكرة مش ولا بد عن الأردن ودا الفندق غيرلي نظرتي وعرفت أنو أصابع اليد مو سوا
لما وصلتو طالعت في المراية لقيت وجهييي محروووووق من كثر اللفلفة في الجبل في عز الظهر
ما كنت حاسة بالحر لأنو درجة الحرارة كانت لما طلعنا 4 وأقصى درجة وصلت لها كانت 14
عاد ندمت وقتها اني ما جبت واقي شمس 😂😂
25 يناير
اليوم يلي بعدو رحنا قلعة عمان
وهي قلعة أثرية تضم آثار من 1950 سنة ما قبل الميلاد الى عصرنا الحديث
ويمتاز موقعها انها على قمة جبل مطل على مدينة عمان حيث يمكنك مشاهدة أبرز معالم المدينة من موقعها الإستراتيجي
مر على القلعة عبر العصور مختلف الحضارات لذلك ستجد فيها آثار من جميع من عاش في القلعة عبر كل تلك القرون
معبد هرقل 👇
الكنيسة البيزنطية 👇
المسجد الأموي 👇
القصر الأموي 👇
بعد أن ما خلصنا جولتنا في القلعة رحنا لواحد من أشهر المطاعم المشهورة بتقديم وجبة المنسف الأردني عشان نجربو ..
وطلبت المنسف معاه مقلوبة زهرة .. لفتت نظري لأنو السوريين يسوو المقلوبة بالبيتنجان وما كنت أعرف إنها تنطبخ بالزهرة وأنا من عشاق الزهرة صراحة 😍😍
الأكل كان لذيذ واللحمة كانت تذوب بالفم 😋😋
لكن حقيقةً ما حبيت المنسف كثير ما أستسغت فكرة إضافة اللبن المطبوخ للرز واللحم
بينما مقلوبة الزهرة أغرمت فيها ولما رجعت السعودية دورت على وصفتها وطبختها 😍😍
بعد ما خلصنا غدا إنتقلنا لزيارة معلم آخر وهو كهف أهل الكهف..
لا أخفي عليكم إنها كانت تجربة مرعبة بالنسبة لي ..
كان جاييني إحساس رهبة لما دخلت الكهف.. ولما شفت إنو في الكهف في قبور أصحاب الكهف ومبينين من وحدة من التوابيت جزء من عظام الميت ورا القزاز خفت بزيادة وحسيت إني بنتهك حرمة الميت ..
ع العموم ما طولنا هناك شفنا الكهف من برا ومن جوا وطلعنا ..
بعدها رجعنا الفندق ريحنا ولما جا الليل رحنا السينما وأتفرجنا فيلمين 3D
الأول
How to Train Your Dragon 3
^ أتوقع واضح إنو كان لعيون هيوفة 😂😂😍
والثاني
Aquaman
الفلمين كلهم حلوين .. بس صراحة تفقعت عيوني من نظارات ال 3D طول الفلمين وحرمت بعدها أتفرج فلم 3D للأبد 😖
بعدها رجعنا الفندق نمنا بعد ما حللنا اليوم كلو بالطول والعرض 😂💗💗
27 يناير
صحينا الصباح إنطلقنا لتبوك عشان نلحق طيارتنا يلي ترجعنا لجدة
وأول ما عدينا الحدود الأردنية ودخلنا الحدود السعودية لقينا في مطر بينزل في تبوك ..
حسيت السعودية بتقلنا ولكم باك 😍😍💘
وخلصت رحلتنا لتبوك والأردن والحمد لله أستغلينا أيام الرحلة أحسن إستغلال
كان نفسي أزور في الأردن وادي رم وكم معلم تاني .. لكن للأسف الوقت ما أسعفني .. إن شاء الله لو صارت لي فرصة تانية أزور الأردن بزور البتراء مرة تانية وأكمل باقي المعالم يلي ما زرتها
1 فبراير
جربت أزرع !
أنا إنسانة مهتمة بالبيئة والحيوانات .. كنت أبا أدخل علمي في الثانوي بس عشان أدرس أحياء وعلم بيئة
أحب أتعلم عن الفواكه وإيش فصائلها وكيف تنزرع وأدق التفاصيل عنها .. لكن مع كذا كانت آخر مرة وأول مرة زرعت في تاني ابتدائي لما زرعت العدس بالقطن 😂💔
وداك اليوم طلبت من عبد المجيد يشتريلي تربة زرعية عشان أزرع فيها ..
وفعلاً دا يلي صار زرعت طماطم ونعناع ..
دا يلي نجح لكن كان في تجارب زراعة حبق وبصل أخضر وخس لكن كلها فشلت ..
الطماطم خلال 3 شهور كبرت بشكل رائع وزهرت وطلعت ثمرة طماطم صغيييييرة وكنت بستناها تكبر بكل ما أوتيت من حماس .. لكن مع الأسف لما سافرت لتركيا
أضطريت إني أتركها عند الحارس .. ولما رجعت من سفري لقيتو عادمها العافية !!
كان تاركها في الظل وكل يوم يسقيها بلَي الموية ( ما أدري أيش يتسمى بباقي اللهجات لكن هو داك الحبل يلي ينشطف فيه الحوش مدري يارب عرفتوه😭😂😂) .. وساقيها بقوة اندفاع للموية عالية لدرجة باينة جذور الطماطم من كثر مو حفرت التربة ..
مع إني قلتله حطها في مكان فيه شمس ولا تسقيها كل يوم 💔💔
مع الأسف الطماطم عفنت من الرطوبة وذبلت 💔
زعلت مرة عليها وقعدت فترة حاطتها في البلكونة أسقيها وأعتني فيها لين فقدت الأمل منها وتركتها في حال سبيلها..
جات الطيور بعد فترة قطعت أغصانها عشان تستخدمها لأعشاشها 😢💗💗
وأنتهت قصتي مع الزراعة .. ما أتشجعت بعدها أزرع مرة ثانية
قلت خليني بعد فترة لين أشتاق للزراعة وأتحمس من جديد 💗
2 مارس
بعد ملكة أخويا عثمان بأسبوع كلمني أخويا أحمد (وهو مبتعث في أمريكا) أنه أرسل لي أمانة مع عمتي يلي جات زارته قبل فترة
وطلب مني أنو أستلمها .. أستغربت إيش دا الشي المهم يلي يتعنى أخويا أنو يرسلو من أمريكا وقعدت أفكر أنه ما يمكن يرسل شي بدي الطريقة الا تكون هدية لأخويا عثمان بمناسبة ملكتو ووطنت نفسي على دا الأساس 😅
قلت لأحمد إنو بنتظر أستلم الأمانة بوقت يكون عثمان موجود فيه عشان أعطيه هي .. وقلي طيب
المهم أستلمتها من عمتي وقلتله خلاص أستلمتها ايش الخطوة يلي بعدها ؟
قلي أباك لما تكوني رايقة تفتحيها ورسلي ملف PDF قلي فيه كل التعليمات وقت ما تفتحيها أقريه .. قلتلو طيب
وطبعاً جا في بالي انو يباني أزين هدية عثمان أو أقدمها بطريقة حلوة 😂😂
المهم رجعت بيتي بعد ما حسيت من كلام أحمد إنو مو ضروري يكون عثمان موجود .. سبت الأمانة يومين بعدين أفتكرتها ..فتحت كرتون الأمانة وفتحت الملف وهنا كانت الصدمة 😢😢💗💗
الملف كان عبارة عن رسالة جميلة لطيفة جداً
والأمانة كانت هدية غير متوقعة أبداً
كل شيء كان لا يصدق .. أنا بالعادة صعب أحد أن بفاجئني .. لأنو عندي حساسات أقدر أتوقع مفاجآت يلي حولي وبعدها أتظاهر أني متفاجئة 😂😂
لكن مفاجأة أحمد غلبتني .. كانت غير متوقعة ابداً 😢💗💗
إبتداءً من توقيت الهدية يلي قلي بعدين انه اختار دا التوقيت بالعنية عشان أحسب الهدية لعثمان..
وبعدين طريقة الرسالة يلي كانت بي دي أف وطلب مني أطبعها بعد ما فتحت الهدية ودا يلي صار ..
وكمان أنه أتعنى وفكر عشان يهديني وهو بعيد عني وبيني وبينه آلاف الكيلومترات وأنتظر عمتي لين تجيه ويرسل هديتي معاها 😢
وإنتهاءً بنوع الهدية يلي كنت محتاجتها خصوصي في ديك الفترة ..
كانت الهدية ساعة رياضية من فيت بيت 😢💗💗
شعوري وقتها كان مرة سعيد .. دمعت عيوني حقيقي .. جاتني هدايا كثير لكن دي الهدية وقعها كان مميز في قلبي 💗💗💗
كنت بالعادة ما أقدر ألتزم بأي إكسسوار أحطه بشكل دائم على جسمي لكن دي الساعة ألتزمت فيها إلتزام رهيب حتى وأنا نايمة ألبسها 😂💗💗 < طبعاً أخدت فترة لين أتعودت عليها لكن بعدها صارت جزء مني أضيع بدونها 😍😍
دي صورة من الهدية والرسالة يلي كانت من أجمل ما وصلني 💗💗
5 مارس
رحت مدينة رابغ مع زوجي في رحلة عمل ..
رابغ مدينة صغيرة وهادئة جججداً .. بحرها جميييييييل بشكل ما تتخيلوا
شاطئ البحر كان ملييييييييييان صدف أشكالو جميلة 😍😍
كانت عندي هواية وأنا صغيرة أجمع صدف البحر.. لكن بعد ما كبرت بحر جدة صار نادراً ألاقي في صدف ولو لقيت غالباً يكون مكسر..
لما رحت رابغ رجعت أستعدت هوايتي ..
مع الأسف حاولت أدور معالم سياحية أزورها في رابغ لكن كانت خالية من أي معلم سياحي.. مدينة صناعية بمعنى الكلمة..
لكن بحرهم عوضني صراحة مرة حبيتو 😍😍
15 مارس
بعد طول حيرة وتردد .. ماما قررت ترجع لسوريا 💔💔
كان قرار صعب على قلبي لما ماما كانت بتستشيرني وأخواني منقسمين بين مؤيد لسفرها (خصوصي إنها زوجت آخر أخواني) وبين المعارض بسبب الحرب يلي هناك 💔
كنت مترددة وخايفة أقول لماما النصيحة المناسبة خصوصي إنو معارضتي لذهابها يعني إبتعادها عن جدتي وأخوالي لمزيد من السنين وهي خايفة إنو جدتي يصير لها شي بحكم كبرها بالسن وهي بعيدة عنها 💔💔
وبين إني أأيدها ويصير لها شي هناك بسبب الحرب وأندم أشد الندم على نصيحتي لها لأنها تسمع لنصيحتي عادةً 😢💔
كان قرار محير .. كلمنا أخوالي وسألناهم عن أوضاعهم هناك وقالوا لنا أن الأوضاع مستقرة وهدأت كثيير..
لما جات ماما بتستشيرني قلتلها يا ماما إنتي تركتي أهلك عشاني وعشان أخواني عشان تربينا بعد ما أتطلقتي إنتي وبابا 💔
خلاص ما قصرتي زوجتي آخر أخواني جا الوقت يلي تشوفي فيه نفسك وتروحي مكان ما نفسك تروحي وتعوضي جدتي عن سنين الغياب يلي غبتيها 💔 ..
كان قلبي بيتقطع وأنا بقلها دا الكلام لأنو ما كان ودي أفارقها لحظة وحدة كيف حأستحمل أفارقها لأجل غير معلوم 😭😭💔
كان قرار قاسي .. أقتنعت ماما فيه وسافرت لسوريا
كان قلبي بيبكي .. حرفياً قضيت حوالي 6 شهور وأنا قلبي مكسور وأحس بضيقة وأبكي لأتفه سبب..
ولما كنت أكلم أمي بالجوال أوريها اني مبسوطة ووضعي أوكي عشان لا تشيل همنا 💔
رجعت ماما يوم 26 أغسطس عشان تحضر فرح عثمان وعلى أساس ترجع مرة ثانية بعد الفرح..
لكن صارت ظروف منعتها ترجع وتأجلت رجعتها لأجل غير مسمى..
غياب ماما علمني حاجات مرة كتييير .. إنو في كثير نعم حولنا إعتدنا عليها وصرنا مو حاسين قد إيش هي مهمة في حياتنا ولازم نحمد الله عليها ونشكره كل يوم..
غياب ماما خلاني أعرف قيمتها في حياتي ..يوم رجعتها كان من أحلى أيام عمري..
كنت بعد الأيام عد لين وصلت وفرحتلي قلبي 😢💗
الله يخليها ليا ولا يحرمني منها ويحفظ لكم أمهاتكم ويرحم المتوفين منهم ويجعلنا أبناء بررة فيهم
1 مايو
كان يوم يوافق 26 شعبان .. قبل رمضان بـ 4 أيام وبعد إنتهاء دراستي بـ 3 أيام ..
قررنا نسافر تركيا مع انو معظم الناس قالولنا كيف تسافرو برمضان؟ خصوصي انو رحلتنا حتستمر 12 يوم
كان جوابنا في عدة نقاط :
1. إننا حنسافر لبلد مسلم فما حنحس بإختلاف سواء هنا او هناك
2. وحدة من أهداف سفرتنا أصلاً نجرب رمضان في مكان غير السعودية 😁😍
3. حنكون مسافرين فعادي نقدر نفطروما حيأثر دا الموضوع على رحلتنا
4. أسعار التذاكر تنزل للنصف في دا الوقت من سنة
5. الأجواء جداً مناسبة للسفر أنه حيكون نهاية الربيع وبداية الصيف فالأجواء حتكون معتدلة ورائعة < وحدة من الأسباب يلي خلتني ما أستمتع في أسطنبول المرة الماضية اني سافرت في الصيف وكان الجو حار مرة
5. نفسيتي كانت تعبانة وما صدقت تخلص الدراسة عشان أسافر
الرحلة كانت جميييييييلة فوق ما أتصور الحمد لله وحقيقي مرة أنبسطت فيها .. لا أخفي عليكم إني أترددت في وجهة السفر لأني سافرت تركيا قبل فخفت تتكرر فعاليات السفرة الماضية .. لكن حقيقي مافي إلا فعالية وحدة أتكررت .. كانت سفرة مختلفة وممتعة جداً يارب لك الحمد ..
كان خط الرحلة يبدأ بوصولنا لإسنطنبول ثم الإنتقال بنفس اليوم الى قرية معشوقية ثم الاننتقال في اليوم التالي الى مدينة يالوا (يالوفا) والمرور ببحيرة سبانجا ثم العودة الى اسطنبول وقضاء بقية الايام الرحلة فيها .
في اليوم الأول بعد وصولنا الى اسطنبول إستأجرنا سيارة وإنطلقنا مباشرة الى قرية معشوقية
قرية معشوقية هي قرية صغيرة تقع ضمن مدينة سبانجا شرق اسطنبول .. مليئة بالشلالات والأنهار المتدفقة من جبل كارتبة
بعد أن وصلنا في اليوم الأول أخدنا لفة ع القرية ولفتني منظر غريب مرة 😯
تشتهر القرية بالأسماك النهرية (اللذيييذة ججداً) لكن طريقة صيدهم للسمك هناك تعتبر غريبة شوية
يتم مد أنبوب أو أسطوانة من النهر تصل الى حوض سمك وأحد جدران الحوض كأنه شبكة يمر الماء من خلالها ويعود الى النهر وتعلق السمكة داخل الحوض
والماء في الحوض جاري من جريان النهر والأسماك عالقة فيه .. انت تختار احدى السمكات العالقة ويتم طبخها لك حسب رغبتك 😍😍
لا أحكيلكم طعمها كيف 😢💗💗
أنهينا جولتنا وعدنا الى الفندق وأنتهى اليوم الأول
إحدى شلالات معشوقية
2 مايو
الفندق يلي كنا فيه كانت تملكه عائلة طيبة وخدومة ولطيفة جداً ..
وقت الفطور ما كان في أحد .. كأن ما كان أحد مستأجر الفندق غيرنا..
طلب مننا يلي في الإستقبال بأدب إنو ننتظر الى ان يجهز الفطور (كنا نزلنا بدري قبل وقت الفطور)..
وبعد قليل بدأت الخيرات تهل على طاولتنا..
حرفياً كمية الأصناف يلي أنحطت عشاننا بس مهولة
والأهم من دا كلو انو كلللو لذيييذ 😍..
بالرغم من انو رحنا بعدها كذا فندق الا انو خدمة دا الفندق بالذات كانت فوق المتوقع..
بعد ما شبعنا كان في كم طبق دوبه يوصل للطاولة .. قلنا للجرسون انو شبعنا خلاص ما يحتاج..
حرفياً قعد يحلف علينا نذوقو قلنا خلاص نذوقو عشانك 😂😂
اللطيف في الموضوع انو ما حسيت اني قاعدة في فندق قد مو قاعدة في بيتي لأن الكل بيخدم بحب أكثر من أنو واجب وظيفي وخلاص 💗
صور للفندق
بعد الفطور إنطلقنا الى قمة جبل كارتبه..
وهو جبل جليدي فيه تلفريك يوصل الى قمته وفي القمة في كافي قدم المشروبات الساخنة وفي مصورين يلتقطوا صور تذكارية للسياح
في الناس يروحوه يمارسوا الرياضات الثلجية في فصل الشتاء لكن احنا رحنا في نهاية الربيع..
مراجيح لقيناها في الطريق للجبل لعبنا فيها
لما كنا نقرب من الجبل كانت في قطع ثلج في الطريق .. كنت أول مرة في حياتي أشوف ثلج فرحتي وحماسي كان لا يوصف 😢💗💗
لما وصلنا لقينا الثلج مغطي الجبل بمنظر مهيب..
ركبنا التلفريك يلي يودي لقمة الجبل .. المنظر كان رااااائع ججداً .. درجة الحرارة كانت 8 مئوية
كان منظر الثلج مع زقزقة العصافير جاب لي الاسترخاء بالرغم من حماسي ..
لما وصلنا فوق على طول نزلت مسكت الثلج بيدي وكااان بااااارد
قعدت سويت كور ورميتها على عبد المجيد 😂😂< محد اترمى عليه كور ثلج بدال الوحدة عشرة 😂😂
انسدحت على الثلج وحققت امنيتي قعدت احرك يدي ورجلي زي الافلام وقمت اطالع على الشكل يلي اترسم على الثلج 😂😂
كان شعور جميل قعدت العب سااعة الين حسيت يدي مو حاسة فيها من البرودة بعدها رحنا الكافي وطلبنا سحلب
وانا بشربو قابلت وحدة مصورة كانت قالتلي عنها صاحبتي انها لما سافرت قابلتها وكان تصوريها مرة حلو ..
سألتها أسمك *** ؟ وأنصدمت لما قلتلها اسمها ولما سألتني كيف عرفتي قلتلها قالتلي عليك صاحبتي..
حرفياً قعدت تصرخ وتقول صرت مشهورة صرت مشهورة 😂😂
ردة فعلها ضحكتني لكن واضح انو الحركة اول مرة تصير معاها لأنو باين صغيرة دوبها بادئة بالمجال
صورتني البوم مع الثلج .. ما قدرت أعدي الذكرى من دون ما أوثقها بألبوم 😢💗💗
خلصنا ورجعنا مرة ثانية للفندق أخدنا أغراضنا وانطلقنا الى منطقة قريبة من معشوقية اسمها ناتوركوي فيها مطعم مشهور اسمو سوبيلي
المطعم يقع فوق نهر وفيه أسواق للتذكاريات وبعض الطيور التابعة للمطعم وسفينة للتصوير فيها
المنظر في المطعم رائع والتمشية فيه جميلة أستمتعت فيه الحمد لله
جلسنا شربنا قهوة وبعدين حركنا وأنطلقنا الى يالوفا ( يالوا) وصلنا الى الفندق نمنا وأنتهى يومنا بحمد لله
بحيرة سبانجا
3 مايو
بعد ما فطرنا انطلقنا الى معلم بارز في يالوفا اسمه قلعة أتاتورك .. أتوقعت ألاقي معلم أثري يستحق الزيارة بعد ما رحت لكن تفاجأت لما وصلت انو كان منزل صغير تحت شجرة وجمبه ممشى فيه لوح تشرح قصة بناء المنزل ..
أتفرجنا على بحر مرمرة شوية وبعدين أنطلقنا الى شلال صودشان
وهو شلال كبييير يقع بالقرب من مدينة يالوفا
شكلو جميييل أول مرة في حياتي كنت أشوف شلال بدا القرب والكبر
كانت الخطة انو نسبح في الشلال لكن الجو كان مررررررررررة بارد لدرجة اني حتى حاولت اغطس رجلي بس 5 ثواني وفقدت الإحساس فيها من برودة الموية
أكلنا فطاير سوتها خبازة عجوزة هناك لكن صراحة ما كانت لذيذة 😂
ما كان نفسي أطلع من المكان مرة كان عاجبني بس قعدنا فيه كثير وكان لازم نروح ينابيع ترمال ولا حنتأخر عن مسار الرحلة 😢💗
كان الطريق لشلال صودشان وسط غابة جبل .. الطريق كان ممتع بالذهاب والإياب ويفتح النفس 😍
وصلنا لينابيع ترمال.. مع انو ليا تاريخ سيء مع الينابيع الحارة في سفرة تركيا الأولى .. إلا أني رحتها عشان عبد المجيد..
للأمانة كانت تجربة أفصل من يلي قبل بحكم إني اكتسبت خبرة من المرة السابقة + كنت بردانة مرة والموية الحارة جات في وقتها امتصت البرودة من جسمي 😂💗💗
بالرغم من انه يضايقني اجلس فترة طويلة بجو فيه بخار كثير لأنه يكتمني ويدوخني.. لكن بشكل عام كانت تجربة لا بأس بها
بعدها رجعنا الى يلوا وصلينا الجمعة واتغدينا ورحنا لـ مشتل كاراجا
المشتل يضم عدد كبيرجداً من أنواع الأشجار الشائعة والنادرة..
حقيقي أشجار كنت أشوفها في الصور بس وشفتها هناك .. مرة حبيت المكان بس مع الأسف المرشد السياحي كن يتكلم تركي بس ما عرفت اسماء الأشجار وتفاصيلها ..
لكن الرحلة كانت ممتعة وبالرغم من كل شيء
4 مايو
في دا اليوم إنتقلنا من مدينة يالوفا ورجعنا الى إسطنبول
في طريق العودة توقفنا لزيارة أكبر حديقة حيوانات في تركيا حديقة فاروق يالوجين
فيها أكثر من 200 نوع من أنواع الحيوانات و أكثر 130 نوع من أنواع الطيور وأنواع مختلفة من العناكب والزواحف وقسم خاص بالأسماك
كانت تجربة ممتعة ومميزة جداً أتمنيت هيفاء معانا هناك كانت حتنبسط مرة كثير 😢💗💗
وأحلى مافي الموضوع انو الحيوانات نظيفة وسليمة..
ماكان في أي روائح سيئة والأقفاص كبيرة تحس الحيوان ماخد راحتو فيها..
يئلمني جداً لما اروح حديقة حيوانات وألاقي الحيوانات وسخة ومريضة وواضح انها جيعانة وأقفاصها ضيقة
غير الروائح يلي كأنها زريبة مو حديقة حيوانات 😢💔
دا الشي يخليني أتعذب إني بدعم أصحاب الحديقة بإساءتهم لدي الحيوانات الضعيفة
لكن دي الحديقة خلتني اتفرج وأنا ضميري مرتاح 💗💗
شفت أنواع مختلفة من الحيوانات ما عمري شفتها بحياتي ..
وكان كل فئة من الحيوانات موفرين لها البيئة المناسبة لها..
الطيور كانت في مكان كبيييير مغلق فيه أشجار وتطير فيه (بعضها كان في أقفاص)
دي صور لبعض الحيوانات يلي صورتها
5 مايو
في دا اليوم رحنا لملاهي إسفانبول (فيا لاند)
كان اليوم يوافق 30 شعبان .. وأيضاً يوافق يوم الأحد (يوم الإجازة من المدارس عندهم)
كاان في زحمممممممممممة مو طبيعية في الملاهي .. كأن كل الناس تبا تروح الملاهي قبل رمضان وما صدقت تجي الإجازة عشان تروح
السرا للعبة حرفياً نوقف فيه ساعة أو ساعتين .. مرررة تعبت فيها وخلص الوقت قبل لا نخلص كل الألعاب 😒
كمان هناك أقنعت عبد المجيد يجرب قطار الموت 😁.. بالبداية كان رافض تماماً لكن حكيته تجربتي لأول مرة لما ركبت قطار الموت وواجهت خوفي ومرة أنبسطت فيه .. وأتشجع وركب وعجبه مرة قلي ايش رأيك نركب تاني ؟😂
كانت تجربة ممتعة بالرغم من اني انصدمت من قلة الألعاب.. في كثير ألعاب كانت مقفلة تفتح بالصيف بس
والمسافة بين الألعاب كبيرة ويبالها مشي .. أتوقعت من سمعة الملاهي تكون تجربتي أفضل من كدا..
أتمنيت لو رحنا في وقت آخر .. أتوقع كانت الزحمة حتكون أخف بكثييير لأنو معظم الزوار كانو طلاب مدارس
بالإضافة اني كنت تعبانة داك اليوم مزكمة ومصدعةبس أصريت إني أروح لأنو في رمضان ما تهون عليا نفسي أروح فيه للملاهي 😂💔
عن نفسي ما حكرر التجربة حسيت إني أنبسطت بملاهي جدة أكتر من دي 😁 < أحب أدعم المنتج الوطني 😂😂
بعد ما خلصنا كنا مررررة تعبااانييين وكان في جدول الخطة نروح حمام تركي
وانا في الطريق كنت بقول لعبد المجيد إني بموت تعب لو مو الحمام التركي كان رجعت الفندق نمت أحلى نومة من دون ما أفكر حتى
وعبد المجيد يشجعني يقلي أحلى وقت تروحي الحمام لما تكوني تعبانة لا تشيلي هم 😂😂
المهم رجعنا من باص الرحلة تبع الملاهي وركبنا في المترو ووصلنا للمحطة القريبة من الحمام ورحنا مشي للحمام ودخلنا بكل سعادة وبهجة .. وتفاجئنا الموظفة إنو لازم حجز قبل لاتجي الحمام والحمام اليوم كل المواعيد فل 😳
أنا وعبد المجيد كدا 😭😭😵😵
بليييز تعبانين تكفى وهي تقول والله لو بيدي شي دخلتكم .. حجزنا لليوم يلي بعده ورجعنا أدراجنا وأنا باقيلي شوية وأبكي من التعب ..
أتفرجت على النافورة يلي كانت قدام الحمام شوية الين غربت الشمس
ورجعت الفندق نممممت
صحيت كان بيأذن التراويح رحنا صلينا في المسجد .. وكانت أول صلاة تراويح أصليها برا السعودية
كانت تجربة مختلفة .. من ناحية لهجة الإمام بالقراءة أو الصلاة نفسها لأن يصلوها بسرعة
لكن كان شعوور مرة جميييل وحبيته حسيت المؤمنين إخوة وإن تعددت الأعراق وأختلفت اللهجات
ما حسيت بغربة أبداً .. وحسيت بنعمة كوني ولدت عربية مسلمة لأن معظمهم مو فاهمين ايش معنى الآيات أو عن إيش بتتكلم
وبالرغم من ذلك أدركت إنو نعمة العروبة سهلت عليا أشياء كثيييرة في الدين ..
لأنو ما أتخيل صعوبة إني أوقف خلف إمام مو فاهمة إيش بيقول أو أقرأ القران وأكون بدال ما أفتح التفسير وأفسر معانيه أحتاج خطوة قبلها إني أترجم القران أول ..
الحمد لله يلي خلقني مسلمة عربية 💗💗💗
وفي شي عجبني كمان إنو يومياً بعض المطاعم يفرشو في الشوارع سفر إفطار صائم وياكل منها الكل سواء مسلمين أو غير مسلمين < كنت أتفرج عليهم من شباك الفندق منظرهم من فوق رهييب 😍
6 مايو
دا اليوم كان اول يوم من أيام رمضان ..
من دا اليوم حبينا تكون بقية الرحلة مافيها فعاليات كثير في اليوم الواحد عشان نخلي جزء من الرحلة فيه إسترخاء أكثر من انو معظمو استكشاف ومغامرات
رحنا دا اليوم لإسطنبول أكواريوم
وهو يعتبر اكبر اكواريوم في الشرق الأوسط ومن أكبرها حول العالم..
شفت فيها انوااااع كثييييرة من الاسماك والمخلوقات والأعشاب البحرية..
وكل نوع من سمك في بيئة حسب طبيعته..
كان في جزء خاص متجمد للبطاريق والمخلوقات يلي تعيش بالمناطق المتجمدة
وفي جزء استوائي حاااررر ما صدقت متى خلصت منه للأسماك والمخلوقات البحرية في المناطق الإستوائية
أتصورت مع القرش صورة خرافية تجنن 🤣🤣💗💗
حقيقي كانت رحلة ممتعة بجميع المقاييس 😍😍
في دي السفرة رحت لمشتل كراجا شفت فيه انواع النباتات
ورحت لحديقة فاروق يالوجين شفت فيها جميع انواع الحيوانات عموماً (برية وبحرية وطيور وزواحف وغيرها)
ورحت اسطنبول اكواريوم شفت فيه المخلوقات البحرية
ولو سألتوني ايت انبسطتي فيها حقلكم كلها لكن اسطنبول الأكواريوم اكتر شي 😍😍
حقيقي كل شي كان حلو ومرتب ومنظم
وفي قسم كمان في اكواريوم يشغلوا فلم 3D يشرح انواع البحار في اسطنبول والطبيعة البحرية فيها + نظارات فيها فلم افتراضي مع كراسي متحركة يعيشوك الجو جوا البحر
مرة أنبسطت الحمد لله
خرجنا من الاكواريوم رحنا لحمام آيا صوفيا حريم السلطان (يلي اتمقلبنا فيه اليوم يلي قبلو) .. كان اول مرة اجرب اروح حمام سواء تركي او غيره
كانت تجربة جميييلة واكتر شي عجبني الحمام نفسه كان تصميمه رائع..
" تم بناء هذا الحمام القديم في عام 1556 من قبل معمار سنان (كبير مهندسي القصر خلال ذروة العثمانيين). يقع هذا الحمام التركي بجانب آيا صوفيا"
كان بالنسبالي الذهاب للحمام لوحده تمشية غير الحمام نفسه 😍
بعد ما خلصت ضيفوني كاسة شاي تركي مع الحلقوم وقعدت أتأمل في الجمال العمراني للمكان..
للأمانة الحمام بالرغم من ارتفاع سعره الا انه خدمة ٥ نجوم.. إبتداءً من الحمام نفسه ثم العاملين فيه وحسن الإستقبال والتعامل والإحترافية المهنية..
انصح فيه بشدة..
7 مايو
انطلقنا في الصباح لبانوراما الفاتح..
وهو مكان يشرح قصة فتح القسطنطينية (إسطنبول) من بداية محاولات فتحها الى فتح محمد الفاتح لها ويشرح سيرة محمد الفاتح وابرز التطورات التي حصلت لإسطنبول بعد فتحها..
وفي الدور الأخير فيه قبة بانورامية كبيييرة تصور مشهد المعركة بصورة إحترافية مهيبة..
المتحف اقل ما اقول عنه انه رااائع 💗💗💗💗
خصوصي القبة رسمها احترافي والاثار الموجودة امام كل مشهد ووصفها تخليك تتخيل المعركة بكامل تفاصيلها وتعجب بالذكاء الحربي يلي كان لمحمد الفاتح وقتها 😍😍😍
بعد ما خلصنا كنا رايحين لمحطة المترو وفجاة ابرقت السما وصار ينزل مطر..
المحطة وكانت تبعد ٥ دقايق تقريباً..
كنت بأجري أنا وعبد المجيد فجأة أسمع صوت نبح كلاب .. ألتفت ولا ألاقي كلبين بيجرو نحونا من بعيد بسرعة جنونية..
أنا عندي خوف من الكلاب بصورة ما تتصوروها.. بس اسمع صوتها اترعب واصير اتلفت يمين ويسار..
المشهد والكلاب بتجري نحوي خلاني اتسمر مكاني حرفياً وأطالع فيها وانا بأرجف خوف 😭😭😭
يالله كنا في موقف لا نحسد عليه فوق انو ملابسي كلها مبلبلة الكلب بيجري عليا عشان ياكلني 😭😭😭😭
ما أدري ايش يلي صار لكن فجأة شفت عبد المجيد بيجري للكلاب وينبح لها بصوت عاااالييي .. الكلاب فجأة وقفت وصارت تجري بعكس الإتجاه الين راحت بعيد
ما أوصفلكم شعوري بعد ما راحت مني ام الركب صار عبد المجيد يهديني وانا منهارة اصرخ دوبي استوعبت يلي صار
من بعدها ما صرت انادي عبد المجيد الا ماي هيرو 🤣🤣🤣🤣
في الظهر رحنا للبازار الكبير اتسوقنا وأشترينا هدايا لأهلنا .. وأشتريت أخيراً جاكيت فرو طويل زي يلي كنت أحلم فيه من زمان (ما أشتريته لأنو جونا في السعودية كان ما يساعد) وكشخت فيه باقي الرحلة 😁💗💗
في الليل رحت مع عبد المجيد لكافي بعيد شوية عن الفندق .. وكان يباله كم باص ونروح من محطة لمحطة لين ما نوصله..
اول ما وصلنا وبدانا نشرب القهوة بدأ ينزل مطر قوييييي كانت الساعة قريب ١٠ ونص والكافي تقريباً كان يباله مشي لين نوصل المحطة يلي تودينا للمحطات يلي تودي للفندق.. وكانت ديك المحطة الوحيدة القريبة لأن المكان مقطوع شوية
وصلنا المحطة بعد ما اتبلبلنا بالكاااامللل وكان فيها ٣ كراسي ومظلة مغطية الكراسي
وقعدنا نستنى .. ونستنى .. وجا موعد الباص وما جا .. وقعدنا نستنى ونستنى.. وجا الموعد يلي بعده وما جا .. والشارع حرفييياً فااااضييي والمطر كل ماله بيزيد بشكل يخوف.. قلت لعبد المجيد خوفي تكون الباصات بطلت تجي عشان المطر والمشكلة الساعة ١٢ توقف كل الباصات وينقطع سبيل العودة 🙆♀️🙆♀️
كانت الجو بررررررررد بشكل مو طبيعي حسيت اسناني بتصكصك والهوا قوويي والمطر أقوى.. كنت بدعي ربي من القلب يعني حتى لو افترضت انو في سيارة وقفت لنا ورضيت ترجعنا يمديه يخطفنا في دا الوقت سلااام سلااام
الحمد لله في موعد الباص الثالث جا اخيراً وانتشلنا من وسط المطر
رجعنا الفندق مع اخر باص وقتها ولا عادها الله من قهوة ما اتهنيت فيها 🤣🤣🤣
بس صراحة جو القلق والخوف مع المطر كان تشويقي وفي مغامرة عيشتني الجو 😂😂
وبس انتهى اليوم بسلاااام اتذكر اني قلت لعبد المجيد في نهاية اليوم : مع الكلب يلي في الصباح والمطر يلي في الليل احتاج حمام تركي تاني يهدي اعصابي لأنو راح هدوء الاعصاب تبع حمام أمس 😭😭😭
8 مايو
دا اليوم هو يوم خروجنا من إسطنبول الاوروبية وقضاء بقية الرحلة في إسطنبول الآسيوية
إستأجرنا سيارة (لانو إسطنبول الآسيوية غير مغطاة بالكامل بالميتروهات زي اسطنبول الاوروبية)
وبعد ما أستاجرنا الفندق واستقرينا رحنا للنافورة الراقصة .. كانت جمييلة .. الأجواء كانت رايقة والنافورة حلللوووة .. أتعشينا في مطعم متخصص باللحوم لذييييذ جججداً .. مرررة أنبسطت يومها يارب لك الحمد
9 مايو
رحنا تلة العرائس .. التلة ما فيها أي شي .. بس اطالة على المدينة.. حسيت نفسي ضيعت وقت فيها.. فندقنا كنا في الدور ال 16 وكان فيه إطلالة على ابرز معالم إسطنبول وبحرها ما كان يحتاج نروح لها ابداً
وانا هناك فاجأتني سائحة أجنبية وطلبت انها تتصور معايا والضحكة شاقة وجهها وبتطلب بكل حماس يا قلبي عليها 😂😂💗💗
أتصورت معاها وبعدين طلبت تتصور معايا انا وعبد المجيد واتصورنا
لا اخفي عليكم اني حسيت بشعور المشاهير 😂😂
ليومكم دا ما ادري ليش طلبت تتصور .. اتوقع لأنو لبسي كان مرة كشخة يومها 😂😂😂 < أتذكر إني رحت مرة للمسجد بنفس الملابس وجاتني سائحة مصرية بعد الصلاة سألتني من فين اشتريتي ملابسك 😗😂💗💗
بعدها رحنا لمكان إسمه القرية البولندية..
"القرية البولندية قام بإنشاءها مجموعة من المهاجرين البولنديين الهاربين من مطاردة الروس لهم بعد احتلال بلادهم قبل 150 عام"
القرية هادئة بشكل ما تتخيلوه .. لدرجة اقدر اقول انو لما دخلناها بالبداية قعدنا ندور عن ناس نسألهم وما لقينا لين دخلنا جوا الفندق وسألنا الإستقبال (حتى الإستقبال بالبداية ما كان موجود)
كانت الخطة نبات يوم هناك لكن بطلنا بسبب انو حسينا القرية صغيرة جداً ومافيها فعاليات يكفيها يوم واحد
بس كانت جميلة وخضرااااء فين ما تطالعو تلاقو اخضر .. كان في تل صغير أخضر .. طلعت لين قمتو وأتشقلبت وانا مسدوحة الين وصلت اخرو < شعور جميل 😂
شربنا شاهي واتغدينا .. احنا كنا السياح الوحيدين يلي هناك .. هدووء فحياتي ما حسيته عارفين داك الشعور يلي تتكلموا ومافي حس حولكم لدرجة تسمعوا صوتكم وانتو تتكلموا ؟ مو صدى .. ماني عارفة اوصف .. الزبدة عمري ما حسيت بهدوء زي دا وخلاص 😂
رجعنا الفندق .. وقبل لا أنام طالعت في يدي لقيت الساعة يلي هداني هي أحمد مو موجودة 😱😱😱
قلبت الغرفة عليها فوق تحت ما بقيت مكان ما دورت .. قلت لعبد المجيد اكيد نسيتها في القرية اتصل على المطعم يلي كنا فيه اسألهم.. اتصل وقالوله ندور ونرد لك ..
نمت وانا ما بقي دعاء ما دعيته 😢
10 مايو
صحيت الصباح وانا فيني من الهم ما فيني .. كانت الساعة من اجمل الهدايا يلي جاتني .. ما كنت حابة اضيعها بسبب إهمال مني 😭😭
قلي عبد المجيد دحين لسا ما فتح المطعم خلينا نكمل يومنا لين يفتح بعدين نتصل قلت طيب
رحنا لحديقة إميرغان .. حديقة تميزت بزراعة زهور التوليب فيها (بس للأسف لما رحنا كانت كلها ذابلة مخلص موسمها) الجو كان جميييل يومها في ضباااب وكان برد .. فطرنا في المطعم هناك كان فطورهم لذيذ .. وأكلنا البطات والنوارس .. حقيقي لو سألتوني من سفرة تركيا ايش أكثر مكان لين دحين راسخ في عقلك حقلكم حديقة إميرغان مرة الجو حلو وبالرغم من إني كنت جداً مهمومة بس أنبسطت مرة
بعد ما خلصنا من الحديقة واتصلنا على المطعم يلي في القرية البولندية وقالولنا ما لقينا شي 💔💔
قلبي اتكسر ميتين قطعة .. طلبت عبد المجيد نرجع للقرية ندور هناك .. والمشكلة كان الطريق للقرية ٤٥ دقيقة روحة و ٤٥ دقيقة رجعة .. مما يعني ضياع نص اليوم (واليوم كان آخر يوم في سفرتنا) .. لكن بالنسبالي الساعة كانت تستاهل ..
رحنا للقرية وقعدت ادووووور ما لقيت .. وانا في طريق الرجعة كنت كلي حسرة وندم إني ما كنت حريصة عليها وضيعتها .. كنت أقول لعبد المجيد عندي إحساس إنها حترجعلي بس مو عارفة كيف 💔
كملنا يومنا ورحنا لزيارة متحف قصر بيليبري..
وهو قصر صيفي وسكن لرؤساء الدول عند زيارتهم لإسطنبول ..
تصميمه العمراني لطيف .. لكن حسيت الأثاث مافيه ذوق أبداً .. عن نفسي ندمت على زيارته.. بالنسبالي زيارة قصر دولما بهجة خلا ما يملى عيني أي قصور أخرى في أسطنبول لأن مافي أي قصر يقارن بجماله..
بعدها ختمنا زيارتنا رحلتنا برحلة بحرية لمعالم المدينة < كنت رحتها قبل في 2017 لكن حبيت أعيدها 💗
ورجعت الفندق جهزنا أغراضنا للعودة في اليوم التالي وانتهى آخر يوم في الرحلة
١١ مايو
صحينا اليوم يلي بعده لمينا الشنط ورحنا عند الإستقبال عشان نسوي تشيك آوت .. كنت حزينة مرة .. لأني عارفة إنو بعودتي السعودية يعني ضياع الساعة مني للأبد 😭😭 وإحنا خارجين خلاص .. رجعت لإستقبال سألتهم شفتو ساعة رياضية ضايعة ؟ (كنت سألت خدمة تنظيف الغرف قبل أكثر من مرة وقالولي لا) قلي موظف الإستقبال أوصفيلي شكلها.. طلعتلو صورتها وريته .. قام فتح الدرج وطلعلي هي 😭😭😭😭😭💗💗💗💗💗
يالله ما تصدقو شعوري وقتها شهقت وأخذتها منو وشكرتو شكر عميق .. قلتله ما تصدق قد إيش دي الساعة تعني لي الكثير 😢💗💗
قلي إنو لقاها عامل النظافة في مواقف السيارات مرمية 😢😢😢💗💗💗
رحت المطار وانا متشققة من الفرحة .. حمدت ربي وشكرته مليييووون مرررة يااارب لك الحمد 😢💗💗
رجعنا السعودية وإنتهت رحلتنا بسلام الحمد لله ..
في إثناء الرحلة كنت بقرأ كتاب أربعون .. كان باقيلي شوية وأخلصو لكن كان نصيبه يخلص بالسعودية 💕
لما رجعت السعودية رحت عند أختي عشان آخد هيفاء من عندها وهيفاء كانت رافضة تقول ابا أعيش عند خالة فاطمة 🤣🤣🤣
وانا مشتااااقة لها وهي ولا عليها مني أصلاً من يوم كنت بتركيا وأتصل عليها أقلها إيش رأيك نرجع ونجي ناخدك ؟ تقول لا لا ترجعوا 😭🤣
مدري عاد أضحك ولا أبكي .. مبسوطة إنها ما حست بغيبتنا ما شاء الله.. وبنفس الوقت خيير تقول ما أبا أجي 😒
على أي حال ما ألومها بيت أختي فاطمة مليان أطفال وفعاليات خصوصي في رمضان مرة أنبسطت عندهم الله يديها العافية 😍
< بعد ما رجعنا بيتنا ووريتها الصور قعدت تبكي تقلي ليش ما أخدتوني معاكم ما أدري إنكم رحتو دي الأماكن 🤣🤣
وخلصت ذكريات تركيا الحمد لله 😍😍
أتوقع كان يبالها تدوينة لحالها صراحة بس ما علينا 😁
يلا نكمل ..
7 أغسطس
أتفرجت أول فلم في السعودية.. كان لو فوق ٦ شهور فاتح السينما في جدة لكن ما اتشجعت ورحت إلا يومها ..
أتفرجت فلم Fast & furious : Hobbs & shaw
كان حلو وعجبتني السينما 😁
8 أغسطس
قرروا اخواني شفاء وفاطمة وعثمان انهم يروحو يحجو .. وبالرغم من مرور فترة طويلة على زواجهم الا انو كل سنة كان يتم تأجيل حجة فريضتهم لأسباب مختلفة .. دي السنة شجعنا عثمان نحج وكان نفسي مرة أحج معاهم مع اني حجيت حجة الفريضة لكن الحج مع أعز أخواني أكيد له طعم مختلف 😍 .. اخواتي واجهو مشكلة في إيجاد أحد يمسك أولادهم فتبرعت أنا بإمساكهم وقلتلهم خلاص حجو بدوني انا حجيت .. وفعلاً حجو أخواني ديك السنة ربي يسرها لهم وراحو 💕💕
٨ اغسطس كان دا اليوم أول يوم من ايام الحج .. مسكت ٤ من أطفال أختي فاطمة وواحد من أطفال أختي شفاء .. كانت تجربة مختلفة لان ما عمري أعتنيت بدا العدد من الاطفال لدي الفترة (٨ أيام) خصوصي إن ولد أختي شفاء كان لازال رضيع عمره ٩ أشهر تقريباً
صراحة أستمعت مرة بالعناية فيهم .. ساعدني عبد المجيد كتير الله يعطيه العافية .. صح تعبت بس والله كنت حاسة ببركة في وقتي وجهدي .. واحلى حاجة إنهم مرررة انبسطو عندنا سوينالهم فعاليات كتيير .. والى الان كل ما جات امهم تسافر يترجو اختي تخليهم عندي 😍😍
21 أغسطس
في الإجازة بدأت مواسم المملكة .. حضرت موسمين منها .. موسم جدة وموسم الطائف ..
موسم جدة بس حضرت عروض الشارع اما الطايف حضرت فعاليتين .. سوق عكاظ وقرية الورد
صراحة شغل مرتب وعلى مستوى.. حبيت كل شي كان موجود
سوق عكاظ كان زي كأنه معرض تراثي أو تاريخي
فيه ناس لابسين ازياء عربية قديمة ويقدمو بعض المسرحيات والعروض
وكان فيه ركن للتعريف بعلماء العرب وأهم إختراعاتهم وعرض بعض النماذج منها .. وألعاب مثل لعبة المتاهة ونظارات الواقع الإفتراضي
أكثر شي لفتني بالفعالية هو ركن حي العرب .. وفيه لكل بلد مساحة معروض فيها تجسيد لأهم معالمها الأثرية ومطاعم لمأكولاتها الشعبية ومساحة للعروض الشعبية
مرة حبيت الفعالية.. مساحتها كانت كبيرة مرة ما كفانا الوقت نلفو كلو بس زرنا أهم الاشياء
الفعالية الثانية قرية الورد
مررررة عجبتني 😍😍😍
حبيت تنسيق الورد والأشياء يلي عاملينها فيه 💕💕
كان في فعالية النافورة الراقصة والعروض المتجولة والقطار والسيرك
احلى فعالية عجبتني كان السيرك 😍😍
حقيقي بلا مبالغة كان عرض إحترافي والفرقة فناانة مرة انبسطت
هناك المهرج اعطى الاطفال بالونات وما اعطى هيفاء وقعدت تبكي .. جا بعد العرض أعطاها بالونة وكرت تذاكري من الفرقة 😍😍😍
بعد ما خلصنا لقينا في برا مطر وهوا قوي ما كنا حاسين فين واحنا بنتفرج < كويس ما طاحت الخيمة علينا 😂😂😂
23 أغسطس - 12 سبتمبر
في دي اليومين الجميلة حصل أكثر حدثين فرحوني دي السنة كلها
أتزوجوا إثنين من أحب أخواني على قلبي
أخويا عثمان واخويا احمد 💗💗
عثمان أخي الشقيق وأحمد أخي الغير شقيق
اتولدو بفارق ١١ شهر بينهم
اتربو سوا .. ودخلو نفس المدرسة سوا .. ودخلو نفس الجامعة ونفس التخصص سوا (مع إختلافات في التخصصات الدقيقة).. أتخرجوا سوا .. واتوظفوا بنفس الوظيفة سوا .. بعدين اتفرقوا أحمد أبتعث وقرر يكمل دراسته وعثمان أنتقل الى مدينة أخرى واتوظف في وظيفة أخرى
كنا دايماً ندعيلهم يارب تتزوجوا سوا 💗💗💗
فعلاً ما شاء الله تبارك الله أتزوجو بفارق ١٩ يوم
وخلوني أحرق عليكم المستقبل ب ٢٠٢٠ جابو اطفالهم بفارق اسبوعين بينهم 😢💗💗
اصدقاء طفولتي ولو بتكلم عنهم لين بكرا ما حأقدر أوصف حجم سعادتي فيهم 💗 ما شاء الله تبارك الله .. حبايبي الله يحميهم ولا يفرقهم ويديمهم ليا يارب 💗
في حاجة كمان حصلت .. في يوم ٢٣ رجعت ماما السعودية وأكتملت فرحتي بوجودها 💗 الله يديمها تاج على راسي ويخليلي هي
2 سبتمبر
هيوفتي كبرت وصارت تروح الروضة 😢💗💗💗
سجلتها في الروضة وبدأت تداوم وتروح الروضة واسويلها سندويتش وأقطع لها فواكه بعلبة الطعام وأكويلها المريول وأمشط لها شعرها ولما ترجع أسألها كيف كان يومها وتقعد تحكيني وأذاكر لها 😭😭😭💗💗💗
ذهاب هيفاء للروضة كان فصل جديد من حياتي كأم .. مشاعر جميلة مختلفة ومليئة بالحب والإحساس بالمسؤولية ..
ما أنسى لما أستلمت أول كرت دعوة لحضور مجلس الأمهات 😢😢 وانا في مجلس الامهات دمعت عيني .. لأنو قبل سنتين هيفاء حضرت مجلس الامهات بس مو عشانها لا كان عشاني أنا 😢💗💗
مشاعر مختلفة .. اول مرة احضر المجلس بنظرة أم مو بنظرة طالبة .. نشدت أنشودة عن الأم دمعت عيوني وماسكة الدمعة بالعافية 😭😭😭
وما أنسى لما اتصلت عليا المديرة قالتلي انو ما شاء الله هيفاء متميزة جداً عن بقية الطالبات وسألتني إذا أسمح لها تنقل هيفاء لفصل التمهيدي..
وما أنسى لما طلبت المعلمة من الأمهات والآباء يسجلو لأطفالهم مقطع صوت يكلموهم فيه .. والاطفال يكتشفو صوت امهم وأبوهم .. فرحتها بمعرفة اصوتنا كانت لا توصف ..
كتبت لها خاطرة لما دخلت الروضة وصفت لها فيها مشاعري تجاهها .. (ربما أنشرها في المدونة يوماً ما)..
قبلها بكم شهر كمان أشترينا لهيفاء سرير وسوينا لها غرفة خاصة فيها وسويناها لها مفاجأة 😍😍
ردة فعلها كانت تجنن 😢💗💗
هيفاء أول وحدة من اليمين
7 سبتمبر
رحت مع زوجي الى نجران في رحلة عمل .. وتفاجأت فيها صراحة مدينة جميلة مخفية عن الأنظار ومالها صيت زي أبها وبقية المصائف ..
لفتني أكثر شي فيها جبالها .. بديعة جداً سبحان الله .. لونها أحمر وواضح فيها الطبقات الصخرية مخليتها كأنها لوحة
كمان هناك في بيوت طينية كثير صح انها مهجورة لكن لازال باقي بنيانها ومعطي المدينة لمسة تراثية جميلة
من الاشياء كمان يلي لفتت نظري هناك إنو أهل نجران ناس محافظين على الزي التقليدي السعودي 😂😂💗 حرفياً كلهم بالثوب والشماغ ومترسمين كأنهم رايحين زواج
حتى لما نروح اماكن ما تستاهل دي الكشخة كلها
في جدة نادراً ما تلاقي أحد خارج الدوام والمناسبات كاشخ مترسم .. في نجران حسيت حقيقي اني في السعودية لأن الكل ملتزم بالزي السعودي 😂👏🏻👏🏻
زرنا هناك عدة معالم سياحية
١. غابة سقام
ما ادري ليش سموها غابة .. تعتبر أقرب للحديقة بس كبيرة مرة ما شاء الله احلى شي انو الجو في نجران كان يجنن 😍😍💗💗
٢. قرية الأخدود الاثرية
أكثر معلم سياحي خلاني أتحمس أروح لنجران هو دا المعلم
قرية أصحاب الأخدود .. القصة الشهيرة التي ذكرت في القرآن في سورة البروج
مدينة أثرية بالكامل فيها مبانيهم وبعض النقوش المنحوتة على الجدران
لكن مع الأسف أهم معلم كان المفروض يكون موجود يلي هو الأخدود مكانه غير معلوم
بالإضافة إلى الإهمال الواضح للقرية مع أنها تعتبر معلم سياحي مهم جداً في المملكة 💔
عجبني .. لكن ما حسيته اكثر من مجرد تجمع لبيوت طينية لأنه كان غير واضح المعالم ومافي اي شي يشرح الأشياء الموجودة ولا مرشدين سياحين..
٣. نافورة جازان الراقصة
لو تبو الصراحة نافورة جازان عجبتني أكتر من نافورة الطايف 💗💗
حسيت حركة النافورة منسجمة شوية مع الأغاني اما في الطايف الاغنية في الشرق والنافورة في الغرب
28 أكتوبر
كان زوجي عنده رحلة عمل للمدينة لمدة ٥ أيام في المدينة .. فأقترحت عليه إيش رأيك ناخد مامتي ومامتك معانا ؟ وقلي طيب
بعد ما فكرت في الموضوع حسيت اني خفت وأتوترت وأترددت .. لأنه بكل بساطة بالرغم من إنو ليا متزوجة حوالي ٥ سنين الا إنو عمرهم ماما وحماتي ما زاروا بعض .. إيوه تخيلوا !! بس يوم زواجنا + يوم ما ولدت هيفاء جات حماتي زارتني وأنا عند ماما وبس
صارت في محاولات عزايم كثيييير لكن كل مرة يصير ظرف وما تقدر وحدة تجي للثانية
فبالنسبالي كانت دي الرحلة حتكون رحلة تعارف بينهم..
وخفت لأنها مدة ٥ أيام تعتبر طويلة وحيكون مسؤولية التعارف عليا أنا خصوصي إنو شخصية ماما وحماتي على النقيييييض تماماً
حماتي إجتماعية وفلللة ومنفتحة بينما ماما تعتبر إنطوائية وهادئة وملتزمة
متخيلين موقفي ايش كاان 😂😂😭؟؟ المشكلة ما كان في مجال للتراجع كنا عزمناهم يجو معانا خلاص 🙆♀️🙆♀️
بس الحمد لله رحنا وانبسطنا والتعارف تم على أحسن وجه .. أنسجموا الإثنين مع بعض وإن كان في إختلافات في الشخصية خلت العلاقة في البداية مربكة شوية لكن انسجمو في الأخير وفهموا بعض وشكرونا مرة على الرحلة الحلوة 😍😍😍
أجمل شي كان إنو الفندق كان مطل على القبة الخضراء.. المنظر جميل دا أتمتعت فيه عيني طول الرحلة وبرضو ما شبعت منو
والله رحلة كانت جمييييلللة جداً نفسي أكررها مرة تانية 😭💗💗💗
26 نوفمبر
رحت مع زوجي في رحلة عمل الى جازان..
رحت قبل كدا على جازان في ٢٠١٥ مع زوجي في رحلة عمل كمان لكن ما اتمشينا فيها..
زرنا فيها عدة معالم
١. قلعة جازان التراثية
قلعة أثرية بنيت في الدولة العثمانية واستخدمت من بعدهم لعدة قرون .. شكلها جميل جداً من برا وقاعدة في قمة جبل ومطلة على البحر الاحمر أتوقعت ألاقي فيها متحف او على الأقل مفتوحة للزوار .. كانت مقفلة وجوتها معدات بناء مصدية ..
اتجولنا في أروقتها بس وطلعنا..
وإحنا خارجين جانا رجل امن سألنا كيف دخلتو وقلنا ممنوع الدخول.. سألناه ليش القلعة بدا الشكل مو مهتمين فيها .. قال إنو جاهم امر بتطويرها وسيتم إعادة ترميمها وتطويرها وفتحها للسياح ..
ما ادري إذا اتفتحت أو لا لكن اتمنى من كل قلبي اذا زرت جازان المرة الجاية ألاقيها بحالة افضل من كدا لأنها من الواضح إنها ابرز معلم أثري في المنطقة..
٢. واحة سد وادي نجران
دا المعلم يفوز بجائزة من أجمل الأماكن يلي رحتها في السعودية 😍😍😍👏🏻👏🏻👏🏻
من عدة نواحي.. سواء من ناحية جمال المنطقة أو النظافة والإهتمام بوضع الكراسي والتصميم الرائع للمكان
حقيقي بلا مبالغة كثييير سألوني عم مكان السد لما نشرت صوره .. أنصحكم تروحوه لو كان لكم زيارة لجازان 👍👍
زرنا عدة مناطق أخرى مثل العيون الحارة لكن للأسف كانت غير صالحة للإستخدام الآدمي .. شفنا في ناس بيعبو من العيون بجوالين وياخدوها معاهم .. مسكت موية العبن كانت فعلاً حارة .. اتمنيت يكون في جهة إستثمارية تستثمر في المكان لأنه فعلاً كنز
وكنا نبا نزور القرية التراثية بس كانت مقفلة ..
أهههممممم مكان كنت أبا ازورو ويلي جيت جازان عشانو اصلاً كان جزيرة فرسان
كانت رحلة زوجي هناك اصلاً ٣ أيام وزودنا يوم رابع مخصوص عشان الجزيرة 😍😍
رحنا في الليل حجزنا في العبارة اليوم يلي بعده الصباح
صحينا الصباح (قبل الشروق) وإنطلقنا للمرسى و وهم بيسوو إجراءات الذهاب بدأ مطر خفيييف ينزل .. فقالوا إنتظروا حتى يخلص المطر .. وفجأة بدأ المطر يزيد بصورة مو طبيعية لدرجة مو شايفة الاشياء يلي بعيدة عني .. وإحنا كنا ع البحر والسيارة بعيدة شوي .. قلي عبد المحبد خلينا نستنى تحت الكراسي المظلة يمكن يخف المطر.. والمطر قعد يزيييد وهوااا قوييي لين صارت المظلة ما تسوي شي زي قلتها 🤣🤣🤣🤣
قعدنا نجري لين وصلنا السيارة حرفياً ملابسي كلها صارت تنعصر من الموية 😂😂😂😂😂
وصلنا السيارة وإحنا نلهث والشوارع كانت غرقانة .. بالقوة لين قدرنا نوصل الفندق لأن معظم الشوارع مقفلة والسيارة بتسبح (مو بتمشي) بشويييش
أصلاً وصلنا الفندق الرسبشن يطالع مصدوم إشبهم دولي 😭😭
الزبدة الموكيت حق الفندق بلبلناه من جزمتنا الغرقانة وملابسنا يلي بتنقط 😂😂
قعدنا الين العصر في الفندق لين بدأت الموية تقدر السيارات تتحرك فيها .. وطبعاً كانت الرحلات لجزيرة كلها فرسان ملغية..
قضينا اليوم الزايد دا في التمشية بربوع جازان
وأنتهت رحلتنا بحمد الله ..
وإنتهت معها أبرز الأحداث في سنة 2019
كانت سنة رائعة اللهم لك الحمد لا أحصي ثناءً عليه..
(رب أوزعني أن أشكر نعمتك التي أنعمت علي وعلى والدي وأن أعمل صالحاً ترضاه وأصلح لي في ذريتي إني تبت إليك وإني من المسلمين)
اللهم إجعل خير أيامي يوم ألقاك .. وآتني في الدنيا حسنة وفي الآخرة حسنة وقني عذاب النار
والسلام عليكم ورحمة الله وبركاته
ليست هناك تعليقات:
إرسال تعليق
* الآراء والإنتقادات البناءة تدفعني للإستمرار دائماً ..