سنة ٢٠٢٠ كانت من اغرب السنوات يلي مرت عليا في حياتي
سنة عجيبة بكل
المقاييس ومميزة جداً بالرغم من انو ما صار فيها احداث كثير الا انو اثرها كان
واضح جداً في نفسي
أبرز الأحداث يلي صارت:
24 يناير 2020
حضرت زواج صاحبتي
ممكن دا الشي
يكون غريب للقارئ ايش المميز في حضور زواج صاحبتك حتى يسجل من ضمن الذكريات المهمة
في ٢٠٢٠ ؟
الجواب انه كان
حرفياً اول زواج لأحد اصدقائي او بشكل أعم لأي أحد من جيلي ..
بحكم اني تزوجت
وعمري ١٦ سنة كان جميع أقراني عزوبيين واستمر دا الحال ٥ سنوات لين صار عمري ٢١
وكسرت دي القاعدة احدى اقرب صديقاتي ليا واتزوجت
سوينالها قبل زواجها حفلة توديع عزبية بسيطة في كافيه على البحر ومرة
أنبسطت يا قلبي عليها 💕
يوم الزواج كان
مرة شاعري ولطيف، مرة كانت متوترة وطلبتني اطلع اقعد جمبها وجلست
ماسكة يدي طول فترة انتظار الزفة 😭😭❤️❤️❤️
وقت الزفة لما شفتها
بتتزف لا شعورياً نزلت دموعي .. شعور غريب جاني كان مزيج بين الفرح والشعور
بالمسؤولية لا تسألوني ليش 🤣🤣
الله يسعدها
يارب ❤️
الجدير بالذكر
انو في بداية ٢٠٢١ جابت بنوتتها وكانت اول بنوتة لوحدة من صديقاتي
حملتها بيدي
وكان شعور لا يوصف .. وخليت هيفاء تشيلها وصورتهم .. الفرق بين بنوتتي وبنوتتها ٥
سنوات ❤️
وقعدنا نفكر كيف
حيكبرو ويصيرو صاحبات زينا 🤣🤣❤️❤️❤️❤️
كوفيد-19
في بداية 2020 بدأنا نسمع عن فيروس منتشر في بعض الدول .. وبالرغم من
اني كنت مهتمة بأخباره إلا اني ما كنت متوقعة منه دي النتائج يلي حصلت بعدها ..
بدأت الأخبار تنتشر عنه زي النار في الهشيم .. وماهي إلا عدة أسابيع حتى أعلنت
الدولة عن إيقاف الدراسة حضورياً وشوية شوية تم إعلان عن الحجر المنزلي لجميع سكان
المملكة ..
في بداية فترة الحظر كنت مبسوطة .. للأمانة فترة الحجز عموماً ما كانت
فترة سيئة بالنسبالي
لكن أكثر الأشياء يلي كانت ضايفتني هي:
1. ما أقدر أطلع من البيت وأتمشى
2. ما أقدر أزور أهلي
3. ما أقدر آكل من مطاعم
في دي الفترة اخترعت أنواع الفعاليات وأتفرجت أفلام وقرأت كتب وسويت
رياضة وعلمت هيفاء أشياء جديدة وسويت معاها تجارب غريبة وكثيير أشياء
حصل فترة الحظر وبعدها بعض الأحداث يلي مهم تتسجل في أرشيف الذكريات
من ضمنها:
8 مارس
الدراسة والاختبارات أون لاين
توقفت الدراسة حضورياً وأنا في عز اختبارات الميد في الجامعة، اختبرت
نص المواد حضورياً ونصها أون لاين .. كانت فترة مربكة، وبالرغم من انها كانت
الجامعة من أول تختبرنا أصلاً على اللابتوبات .. لكن صار في شي جديد وهو مراقب آلي
فكرته يوترك طول الإختبار ويطلع لك إشعارات اذا اتحركت نص حركة أو طلعت نص صوت
زيادة على اني خايفة يفصل النت عليا فجأة وما ألاقي أحد حولي ..
ومن المواقف يلي ما أنساها فترة الحظر بدا الخصوص انو في وحدة من مواد
التخصص وانا بختبر الاختبار النهائي صار في خلل في المراقب الآلي وقفل عليا
الاختبار فجأة .. واتواصلت مع الدعم ومحد رد عليا ونزل لي F في
النتيجة
رد علي الدعم بعد مليون اتصال وألف سنة وقالولي انو راحت عليك اتأخرتي
تم رفع أسماء يلي حيعيدو الاختبارات من زمان ! < وهو التأخير من عندهم
كان في كثير طلاب صارتلهم مشاكل
وعادلوهم الاختبار لكن المادة يلي حصل لي فيها المشكلة ما كان فيها إلا أنا بسبب
انو المادة تركيز تخصص وعدد طلابها 21 طالب في كل الشعب !
ولهذا السبب كانو شايفين انو ماله
داعي تنكتب أسئلة جديدة وإختبار جديد عشان طالبة وحدة بس !
فتم تصريفي وتنزيل F ليا وعلى بالهم انهم لو ماطلوني بستسلم وأحمل
المادة
كنت سنة تخرج وأي تأخير بحملي وحدة من المواد يعني تأخر تخرجي ترم
كامل !
ما تتخيلو قد ايش بكيت ووقتها دعيت ربي دعاء من وسط قلبي انو يفرجها
عليا وينصرني عليهم وما يضيع تعبي ويكسر فرحتي بالتخرج
أرسلت بعدها ايميل لعميد القسم في
الجامعة وونائبته وما بقيت ايميل له علاقة بالقضية ما ارفقته فيه
كتبت رسالة طويلة استنجدت فيها بيهم
وتخللها كثير من الشرشحة والتهزيء
حكيت حكايتي مع الدكتورة يلي غسلت
يدها من موضوعي وقالتلي مالي صلاح وموظفة الدعم يلي ما ردت إلا بعد مليون اتصال
عشان تقلي راحت عليك وما تعبت نفسها بالنظر في موضوعي، إضافة إلى نشر غسيل بعض الأقسام
الأخرى في الجامعة
أرسلت الرسالة وبعد ما لا يقل عن
ساعتين لقيت جوالي يتراعد من الرسايل يلي بتوصله
لقيت العميد بيسأل المسؤولة ايش سبب
عدم حل قضية الطالبة بالرغم من انو لها أكثر من أسبوعين؟ والنائبة تحط استفهامات
وفووووضى
كان يوم ثلاثاء وباقي على إجازة
المعلمين يومين (الطلاب أجزوا من زمان) وكان آخر يوم لاختبار يلي حصلتلهم مشاكل
يوم الخميس .. وقفل تسجيل رفع الأسماء من الأسبوع يلي قبله
من ضمن الإيميلات يلي وصلتني كان
إيميل اعتذار وحددو معايا موعد للاختبار الجديد
اليوم يلي بعده يوصلني اتصال من رقم الدعم
(يلي ردت بأسلوب زي الزفت وصرفتني)
كانت تعتذر مني وتأكد عليا موعد الاختبار
إذا يناسبني أو لا
أختبرت يوم الخميس وكنت آخر طالبة
تأجز داك الترم
قعدت أبكي بعد ما خلصت إختبار ما كنت
مصدقة إنو خلص الموضوع على خير .. كنت على أعصابي طول الفترة ذيك 😭😭😭
سجدت سجود شكر انو ربي خلصني من
الظلم وأستجاب دعوتي وكانت فرحتي مضاعفة بالإجازة وقتها
الحمد لله 😢💗💗💗💗
11 أبريل
سويت بازل 1500 قطعة
من ضمن فعاليات الحجر وبعد ما خلصت
إختبارات الترم الأول كان عندي بازل شاريته من زمان وما ركبته بسبب إني مو لاقية
وقت
أقترحت على عبد المجيد وهيفاء نركبه سوا
وهبقتهم ووافقوا ومرة كنت مبسوطة وبدأنا تركيب
ساعدني عبد المجيد لمدة ساعة وحدة بس
وبعدين قلي يلا مع السلامة 😂
وقعدت أركبه لوحدي وخلصته في 6 أيام
بس .. كان زمن قياسي بالنسبالي ومستحيل كنت أقدر أخلصه في دا الوقت لو ما كان في
حجر
كان من أجمل الأشياء يلي أنجزتها في 2020 😍
أتعلمت الطبخ
ممكن يجي ببالكم كيف أتعلمت الطبخ وأنا ليا أكثر من 6 سنين أطبخ ؟
عشت عمري كله أطبخ من باب إنه لازم
أطبخ .. ما أذكر إني قد طبخت بحب وكنت متحمسة لو إلا مرات قليلة في حياتي .. ولأني
مشغولة بالدراسة وبسبب ودا الموضوع تقريباً نص أكلنا كان من المطاعم
لما جا الحجر كان أكثر كارثة
بالنسبالي إنو ما يمدي آكل من برا .. تأزمت نفسياً وأنا ما كنت طايقة الطبخ مع
وجود أكل المطاعم كيف بعد ما صار إلزامي ؟ بالرغم من انه كان زوجي بيساعدني وبيطبخ
بعض الأحيان، لكن برضه كنت متأزمة من الموضوع كثير 😭
في يوم طلبت من مرسول وما كان في أحد يجيب الطلب وأتلغى طلبي وقعدت
سويت عزا < النفسية كانت بريالين 😂
لاحقاً فكرت في الموضوع وقلت شيماء لأول مرة في حياتك جربي تطبخي لأنك
نفسك تطبخي
فتحت مقاطع في اليوتيوب وصرت أدور الأشياء يلي مشتهيتها وبدأت أسويها
صرت أستمتع بالطبخ وأجرب أضيف أشياء جديدة بدال ما أمشي على الطبخة
بحذافيرها.. ولا كمان صرت أخترع طبخات وأتعلمت أسوي كيك .. ولأول مرة في حياتي زبط
معايا وسويت حفلة لهيفاء وعبد المجيد بمناسبة النجاح
خرجت من الحجر وأنا متصالحة مع الطبخ تماماً وصار طبخي ألذ وفيه نفس .. وكان دا أجمل شي علمني هو الحجر
أتعلمت الحلاقة
بحكم إنو كل الحلاقين قفلوا بسبب كورونا عبد المجيد أتورط بحلاقة شعره
وطول شعره وصار كثيييف
وبالرغم إنه كان يحلق ذقنه إلا إنو وضع شعره كان مزري
كان عندنا آلة حلاقة .. أقترح عليا أجرب أحلقله وفعلاً جربت وأتعلمت
على راسه 😂
كانت النتيجة مبهرة بالنسبة لأول مرة حتى عبد المجيد قعد فترة بعد
الحجر يقلي تعالي حلقيلي
شكراً للحجر خلاني أكتشف موهبة ما كنت عارفتها زمان
زيادة على انو عبد المجيد علمني حلاقة الذقن وجربت عليه ستايلات ذقن
جديدة وكانت دائماً جملتي "لا تخاف جرب محد شايفك قاعدين في الحجر"
قضينا رمضان والعيد لوحدنا
جمال رمضان والعيد بلمة الناس وفرحة الأطفال، مع الأسف رمضان والعيد
جا ولسا الحجر موجود 😢
كنت بحاول أسوي فعاليات تعوض الفرحة ومن ضمنها زينت البيت بزينة رمضان
ولما جا العيد زينته مرة تانية
في رمضان كنا نصلي صلاة التراويح ونقرأ قرآن مع بعض، سويت معمول 😍
يوم العيد لبسنا وكشخنا وصلينا صلاة العيد مع بعض وسويت فطور العيد ولقيمات وزينت الطاولة وقعدنا ناكل وإحنا مستحيين وكاشخين 😂😂💗💗
بعدين عايدنا بعض بالعيديات وسويت
لعبة البحث عن العيدية لهيوفة ومرررة أنبسطت
بعدها بكم يوم فك الحجر وزرت أهلي وأهل زوجي الحمد لله 😢💗
17 مايو
سويت سفرة بنت الملك لهيفاء
في تقليد سوري قديم الطفل يلي يصوم أول مرة فحياته يشتروله أي شي نفسه
فيه ويفرشوله سفرة ويجلس يفطر عليها أول ما يأذن
من بداية رمضان كانت هيفاء تبغى تصوم وكل مرة تحاول وما تقدر تكمل
فتفطر
إلى أن فاجئتني يوم وقالتلي ماما أنا حصوم اليوم .. وبالرغم من إنها
ما أتسحرت إلا أنها صبرت ما شاء الله
كان عمرها 5 سنوات، والحجر كان وقتها جزئي .. لحقت آخدها على البقالة
وأشترت يلي نفسها فيه
وقعدت تستنى المغرب لين ما أذن وأكلت من سفرتها 😍😍
أثر الحجر عليا
شيماء قبل الحجر غير شيماء بعد الحجر
1. بسبب البعد عن الناس كان عندي وقت طويل إني أقعد
مع نفسي وأراجع أخطائي وأحاول أصححها والحمد لله أتخلصت من أكثر من عيب فيني وخرجت
من الحجر وأنا بنفسية وشخصية جديدة
2. صرت إنسانة بيتوتية، من زمان كنت ما أقدر يمر
يومين ما أطلع من البيت أتمشى .. لكن بعد الحجر صار ما عندي مانع أجلس في البيت
كثير بل بالعكس لما أطلع كم يوم ورا بعض أضايق وأحس برجع البيت أستكن
3. قضيت وقت طويل مع هيفاء وعبد المجيد وفتحنا مواضيع ما قد أتطرقنا لها سابقاً، خرجت من الحجر وعلاقتنا كانت صحية أكثر وفهمنا بعض بشكل أكبر
خلص الحجر وخلصت ذكرياته الجميلة كانت فترة مميزة جداً وخرجت منها
بفائدة كبيرة الحمدلله
23 يونيو
اشتريت زرعات جديدة
بعد تجربة زراعة الطماطم في 2019 (يلي موتها حارس العمارة)، قفلت نفسي
فترة طويلة من الزراعة، لكن فترة الحجر حسيت قد إيش مهم الواحد يكون عنده نباتات
وحديقة مصغرة في بيته
وأول ما خلص الحجر رحت اشتريت 4 أنواع مختلفة من النباتات وحطيتها في
بلكونتي
وهي: الياسمين الأحمر، جهنمية بيضاء، جهنمية وردية، ريحان
شكلها مرة جميل ويجيب السعادة خصوصاً مع لحظة غروب الشمس 💗
6 يوليو
أشتريت مكنسة روبوت
عندي قناعة تامة إنو الإنسان خلق لتشغيل عقله .. وأي مهام روتينية لا
تستلزم وجود عقل لا يجب أن يشغل فيها الإنسان وقته ويبذل فيها جهده قدر ما
يستطيع، ويدخل تحت هذه القناعة عندي أعمل المنزل الروتينية .. يلي من ضمنها غسيل
الصحون وتكنيس البيت
في 2019 اشتريت غسالة صحون وكانت واحدة من أحسن الأِشياء يلي اشتريتها
في حياتي الحمد لله ووفرت عليا كثييييير وقت وجهد
سمعت بعدها كثير عن المكنسة الروبوت لكن ما كنت ماخذة موضوع شرائها
بجدية
في فترة الحجر من ضمن الأشياء يلي بحثت عنها المكانس الروبوت .. جردت
جميع الشركات يلي تبيع مكانس روبوت وسويت مقارنة بين خصائصها وأسعارها .. ووقع
اختياري على مكنسة من شركة شاومي الأفضل من ناحية الخصائص والسعر
اسمها XIAOMI MIJIA Robot Vacuum
اليوم أنا ما أقدر أوصف كيف حياتي بدون المكنسة .. يا الله قد إيش
وفرت عليا وقت وجهد .. وانا خارجة من البيت أشغلها أرجع ألاقي البيت نظيف .. أو
وأنا أطبخ أشغلها أخلص طبيخ ألاقي البيت نظيف
مرة من المرات كانت هيفاء بتلعب بالرمل السحري ونترت البيت كله وجاني
مشوار طارئ أضطريت أطلع من البيت فوراً وهو الرمل في كل مكان .. وأنا أكره أرجع
البيت ألاقيه مقربع .. وقبل لا أطلع شغلت المكنسة
رجعت لقيت البيت نظيف ويلق والرمل كله نظفته المكنسة
ما تصدقوا قد إيش كنت مبسوطة .. تعتبر المكنسة الروبوت من أحسن
القرارات يلي اتخذتها في 2020
وأنصح أي شخص يشتري غسالة صحون ومكنسة روبوت أضمن له بيوفر تقريباً
25% من شغل البيت الروتيني 👍
12 يوليو
صبغت شعري بنفسي
كنت حابة أغير من شكلي بحاجة غير قص الشعر .. وكنت رافضة فكرة صبغ
الشعر تماماً لأني أعرف ضرر الصبغة على الشعر ومو حابة أخرب شعري
بعدين قعدت أدور على صبغات طبيعية ممكن تفيدني ولقيت في آي هيرب صبغة
طبيعية خالية من جميع المواد يلي تضر الشعر عبارة عن مزيج من 20 عشبة
اشتريتها واخترت أفتح لون لأني عارفة إنو شعري لونه بني غامق فما تأثر
فيه الصبغة بسهولة
اخترت هذا اللون
وصلتني الشحنة وصبغت شعري بنفسي
بعد ما غسلت شعري لقيت صار لونه بني فاتح مع خصلات ذهبية
التغيير كان بسيط لكن للأمانة انبسطت فيه وكانت تجربة جديدة بالنسبالي
لكن ما أفكر أعيد التجربة وأصبغ شعري مرة تانية
23 نوفمبر
أشترينا بلابل
بعد زن طويييييييييل من هيفاء عشان نشتريلها قطة أقنعنها بأهون شي على
نفسنا نشتريلها بلابل
قعدت عندنا أسبوعين بس وبعناها ! ليش ؟
لأنو بكل بساطة قلبي الصغير ما يستحمل اني أحرم كائن من حريته ..
حرفياً طول دي الأسبوعين كنت فاتحتلهم القفص على مصراعيه يطيروا في انحاء البيت
على كيفهم .. وكانو يحبو يوقفو عند الشباك مرة ولاحقاً اكتشفت انو البلابل غالباً
تكون طيور حرة يصطادوها الصيادين أكثر من كونها طيور تعودت على الأقفاص
بعدها حصل موقف بسبب انو الطيور دائماً مفلوتة علقت الأنثى في وحدة من
الأماكن الخطيرة في البيت وقعدت أدورلها لين لقيتها والحمد لله يلي ربي سلمها
صرت أحاول ارجعهم القفص لأني خايفة عليهم وصارو يرفضو يرجعو .. حرفياً
أول ما يشوفوني جاية بقفل القفص يطيروا منه على طول
بالنهاية حطيت كاميرا مراقبة وبالحيلة قدرت اخدعهم وأحبسهم بالقفص
ما قدرت استحمل سجنهم وبعتهم بعدها بيومين لشخص مربي طيور وعنده مثلهم
كتير
أطمنت على مستقبلهم الله يوفقهم يارب وان شاء الله يكون المكان هناك
أفضل لهم
وحرمت يومها أقتني أي نوع من أنواع الطيور وأسلبها حريتها
22 ديسمبر
قفلت متجر الأرنب
كانت خاتمة السنة دي حزينة جداً وسعيدة جداً في نفس الوقت بنفس غرابة
دي السنة ..
مع ضغط الجامعة سحبت على متجري بشكل كبير .. وبعد فترة لقيت نفسي فقدت
شغفي تجاه الأشياء يلي ببيعها .. وانا انسانة ما اقدر اشتغل بدون شغف .. قناعاتي
تجاه الأشياء الكمالية اتغيرت خلال ال5 سنوات
وبسبب دا الموضوع انعدم تفاعلي في المتجر وبدأ يقل عدد عملائي
تدريجياً ..
وبالرغم من اني فكرت اقفله اكثر من مرة إلا انو قلبي ما كان يطاوعني
..
في داك اليوم اتخذت قراري .. وكلمت جمعية خيرية لرعاية اليتيمات يجو
ياخدو أغراض المتجر
في البداية رفضو لأنو ما يقبلو التبرعات غير الفلوس لكن بعد إصرار وإقناع مني وافقو ..
جمعت كل أشياء متجري في
كراتين واعطيتها لمندوب الجمعية
بعد ما راح المندوب قعدت أبكي من وسط قلبي .. كنت حاسة بمزيج غريب من
المشاعر ما بين حزن على فراقه وبين فرحة إنجاز وبين سعادة داخلية
افتتحت المتجر وكان عمري 17 سنة .. كنت دوبي والدة بنتي هيفاء .. وبالرغم من اني كنت صغيرة إلى اني حققت نجاح باهر ولله الحمد .. وصل عدد متابعيني في الانستغرام لـ 29 ألف متابع .. وحققت مبيعات عالية الحمدلله واستمر معايا 5 سنوات .. من 2015 إلى 2020
كانت فترة جميلة جداً وبالرغم من انو اتغيرت قناعاتي في المتجر بعدين لكني فخورة جداً بالإنجاز يلي سويته
لاحقاً ارسلي المندوب انو وزع المنتجات على اليتيمات وكانت فرحتهم لا
توصف .. قلي انا نفسي ما كنت متصور ردة فعلهم
للأمانة هادي أجمل نهاية حلمت فيها لمتجري .. وأجمل نهاية حلمت فيها
لسنة 2020 💗
الحمد لله حتى يبلغ الحمد منتهاه
الحمد لله الذي هدانا لهذا وما كنا لنهتدي لولا أن هدانا الله
الحمد لله رب العالمين
ليست هناك تعليقات:
إرسال تعليق
* الآراء والإنتقادات البناءة تدفعني للإستمرار دائماً ..